Sandugo Trade Expo 2018
gitakda sa Hulyo 25-29
TAGBILARAN CITY, July 10 (PIA)--Buksan na usab sa Department of Trade & Industry (DTI) Rehiyon 7 ang Sandugo Regional Trade Exposition ning tuig sa The Block sa Island City Mall ning syudad sa Tagbilaran sa Hulyo 25.
Ipasundayag sulod sa lima ka adlaw ang mga nagkalain-laing lokal nga mga produkto.
Gipaabot nga mokabat sa 150 ka lokal nga patigayon ang gitakdang mosalmot ning tuig nga Sandugo Trade Expo nga molanat taman Hulyo 29.
Ang trade fair ning tuig gitawag sa DTI nga “Best of the Islands,” diin target niining makahalin og P25 milyon gikan sa inisyal nga P22 milyon nga target.
Ang mga exhibitors maggikan dili lamang dinhi sa Visayas, apan lakip na usab gikan sa Mindanao ug Luzon nga gitakdang ipakita usab ang ilang mga produkto lakip na kadtong ubos sa programang One Town One Product (OTOP) sa DTI.
Pipila usab sa mga exhibitor naglakip sa mga negosyante nga nipaubos sa Kapatid Mentor Me (KMM) program sa DTI nga nagtinguhang mapalambo pa ang ilang abilidad nga mamahimong makigtigi sa ubang mga produkto sa ubang lugar.
Ang Sandugo Trade Expo mopasundayag sa nagkalain-laing produkto gikan sa mga kagamitan, kasangkapan, kahimanan, novelty items ug mga lab-as ug gi-proseso nga mga pagkaon.
Gawas sa mga exhibitor gikan sa probinsiya sa Central Visayas, ang maong trade expo gipaabot usab nga dugokon sa mga mamamalit sama sa mga ahente, exporters, wholesalers, retailers, manufacturers ug subcontractors.
Ang Sandugo trade expo gi-isip usab nga kalihokan nga tinguhang e-promote ang lalawigan sa Bohol isip tourist destination. (ecb/PIA7-Bohol)
Ang Sandugo Trade Expo karong Hulyo 25-29, 2018 mopasundayag sa nagkalain-laing mga produkto sama niining mga produktong lokal gikan sa lungsod sa Antequera ug mga produktong raffia sa Tubigon Loomweavers. (ecb/PIA7-Bohol)
No comments:
Post a Comment