Supertyphoon Gardo nakasulod
na sa Pilipinas, di' moigo sa yuta

CORTES, Bohol, July 9 (PIA)--Ang kusog nga bagjo nga gisundan sa mga tigpaniid sa lakat sa panahon gahapon nakasulod na sa Philippine Area of Responsibility (PAR) ug karon ilhon na nga Gardo (#GardoPh)

Sa ilang Severe Weather Bulletin #1 nga gipagawas sa Philippine Atmospheric Geophysical and Astronomical Services Administration (PAG-ASA) gibutyag nga ang bagjo nga si Gardo, ganinang alas 4:00 AM, ang sentro niini nasundan sa mga weather observers, pinasikad usab sa ilang mga kahimanan, nga naa na sa 1,325 km kasubangan sa (East of) Basco, Batanes (21.3 °N, 134.7 °E)

Gitagna nga dili na gani moigo sa yuta, ang nahisgutang bagjo nga gi-tawag nag supertyphoon, nagdala sa maximum sustained wind speeds sa 200 kilometros matag oras (kph) duol sa sentro niini ug kalit-kalit nga paghuros nga mo-abut sa 245 kph.

Gibanabana nga ang bagjo nga si Gardo, mopadayon sa iyang rumbo paingon sa kasadpan Amihanangkasadpan (West Northwest) sa gikusgon nga 30 kph.

Tungod niini, ugma sa buntag sayo, ang bagjo, naa na sa 760 km kasubangan-Amihanang kasubangan sa (East Northeast of) Basco, Batanes(23.2°N, 128.7°E), samtang sa Miyerkoles pohon, naa na kini sa 555 km Amihanan sa (North of) Basco, Batanes (gawas sa PAR)(25.4°N, 122.5°E).

Pagka Huwebes sa buntag, human sa 72 oras, tua na kini sa 1,065 km amihanang-kasadpoan sa (Northwest of) Basco, Batanes (gawas sa PAR) (28.2°N, 115.8°E)

Dili man makatamak sa kamad-an, si GARDO" mahimong mokutaw sa habagat (Southwest Monsoon) ug kini maka-angil sa mga kjusog nga pag-uwan sa MIMAROPA ug Western Visayas, ug panagsang pag-uwan sa Metro Manila, CALABARZON, Bicol Region, Zambales, Bataan, ug Aurora taman ugma, Martes.

Sa laing bahin, ang mga pag-uwan dala sa habagat maka-angin gayud sa kasagarang bahin sa Luzon, ilabi na sa mga kasadpan nga bahin niini sugod sa Miyerkoles (11 July).

Dala na usab niini, ang mga molupyo sa mga nahisgutan nga mga lugar, ilabi na niadtong naa sa mga ubos, danawan ug mga lupa nga lugar gipasidan-an na daan sa posible nga mga pagbaha samtang kadtong naa sa mga kabukiran, gipasidan-an na sa pagdahile ug pagkahuinlak sa yuta dala sa kusog nga mga pag-uwan.

Kadto usab nga mga may paglawig sa kadagatan, ilabi na sa (northern) amihanan ug kasubangan nga mga bahin sa Northern Luzon, gitambagan nga delikado na kini.(rahc/PIA-7)