2 ka Knowledge Resource Network, 

gilusad sa Bangko Sentral sa Bohol 

TAGBILARAN CITY, July 31 (PIA)--Duha ka Knowledge Resource Network (KRN) ang pormal nga gilusad sa Bangko Sentral ng Pilipinas (BSP) sa lalawigan sa Bohol karong adlawa. 

Ang unang KRN gilusad sa Provincial Library and Information Center diin gipangunahan kini nilang BSP Assistant Governor lluminada Sicat, BSP Regional Director Leonides Sumbi, Gob. Edgar Chatto ug Board Member Gloria Gementiza. 

Nanghatag og mga libro ug uban pang pang reading materials ang BSP sa lalawigan sa Bohol ubos sa Memorandum of Agreement nga gilagdaan nilang Sicat, Sumbi, Chatto ug Gementiza. 

Ang KRN sa Provincial Library and Information Center mao ang ika-149 nga KRN Center sa BSP. 

Makatabang ang gipanghatag nga mga libro sa publiko ilabi na sa mga estudyante aron mahibaw-an ang mga impormasyon kalabot sa BSP ug sa kahimtang sa ekonomiya sa nasod sa kinatibuk-an. 

Ang KRN Collection magdala sa BSP ngadto sa mga lokal nga komunidad pinaagi sa pagpasabot sa ekonomikanhon ug pinansiyal nga konsepto nga magdala og kabibalo ug makatampo sa kalamboan. 

Ang KRN parte sa pasalig sa BSP uban sa pagatukoron nga BSP Bohol Branch sa barangay Tinago lungsod sa Dauis, sa pag-promot sa ‘economic ug financial literacy’ subay sa probisyon sa serbisyong pinansiyal ug magsilbing tigpaminaw aron ang tingog sa katawhan madunggan alang sa paghimo og mga polisiya sa BSP. 

Ang pakig-alayon sa mga library maka-dugtong sa mga researchers sa mga materyales sa BSP ug maka-pasilitar usab og panag-ambitay og impormasyon. 

Ang laing KRN Center gilusad usab sa Bohol Island State University library, Main Campus, ning syudad ug mao kini ang ika-150 nga KRN Center sa BSP. 

Niadtong Marso 2018, gibuksan ang unang KRN dinhi sa lalawigan nga nahimutang sa Holy Name University (HNU) library. (ecb/PIA7-Bohol) 

Gipangunahan nilang Board Member Gloria Gementiza, Gob. Edgar Chatto, BSP Assistant Governor lluminada Sicat ug BSP Regional Director Leonides Sumbi ang paglusad sa ika-149 nga Knowledge Resource Network (KRN) Center sa Bangko Sentral ng Pilipinas nga nahimutang sa Provincial Library and Information Center, ning syudad. (hulagway sa BSP)