Tuesday, August 14, 2018


28% sa mga barangay sa Bohol
deklaradong luwas na sa drugas

TAGBILARAN CITY, Bohol, August 13 (PIA)—Dul-an sa 30% sa kinatibuk-an nga mga barangay sa Bohol ang na deklara nga nakalingkawas sa illegal nga drugas, ug niini, nag-una na usab ang Bohol sa tibuok rehiyon sa may labing daghan nga kabarangayan nga wala nay drugas.

Kini maoy gibutyag ni Dangerous Drugs Board Chairman ug kanhi Department of Interior and Local Government (DILG) Undersecretary Catalino S. Cuy, didto sa pormal nga magpadayag sa 321 ka kabarangayan sa 23 ka lungsod sa Bohol ang nadeklara nga wala lay mansa sa drugas.

Kinatibuk-an nga 1,109 ka barangay ang nia sa Bohol ug 788 na lang ang nahibilin alang sa sunod nga mga batches nga ideklara nga drug cleared ug drug freed.

Dungan sa pagdeklara sa labing daghan nga barangay nga nakalingkawas na sa drugas, gipahinumdom ni Cuy, kinsa kanhi taas nga opisyal sa pulis, nga mas daku na ang responsibilidad sa mga nakalingkawas nga barangay tungod kay kinahanglan na gayud nila nga ipadayon nga wala nay drugas nga makasamok.

Si Cuy, nga may kasinati-an sa pagpangalagad sa pamulis sa tibuok nasud, ug kanhi DILG Officer In Charge, mipasabut nga ang gipangdeklara, nakatagbaw na sa Regional Oversight Committee.

Ang Regional Oversight Committee nga gilangkoban sa mga ahensya sa gobernor nga may kalambigitan sa mga serbisyo sa pagpahiuli ug pagpabuntog sa illegal nga drugas, may nalista nga mga rekisitos aron ilhon ang us aka lugar nga nakalingkawas na sa drugas.

Sa katikaran, si Gobernador Edgar Chatto, una na nga mipadayag nga kon ang Bohol kanhi maoy may labing daghan nga mga surrenderers sa illegal nga drugas, kini lamang nagpasabut nga matinud-anon ang mga taga dinhi sa pagsurrender aron matabangan.

Human sa dul-an sa 40 mil ka mga Bol-anon ang mipakita sa kasibut nga mag-usab nag mobiya sa illegal nga drugas, napamatud-an, nga 114 lamang ka Bol-anon nga migamit sa illegal nga drugas ang nakita nga may taas nga risgo sa pagkadaut sa drugas.

Ang 114 ka mga Bol-anon mao lamang ang nagkinahanglan nga isulod sa usa  ka medical facility aron ipahiuli gikan sa pagpagapos sa drugas, dugang ni Chatto.

Mao na kini ang sinugdanan sa atong mga kalampusan, butyag ni Chatto ngadto sa libo-an ka tawo nga misulod sa Bohol Cultural Center sa pagdeklara sa pagkaluwas sa illegal nga drugas sa mga barangay.
 
Dugang sa gobernador nga nagsobra na ang iyang kalipay sa 321 ka barangay sanglit kini isipon na nga tampo sa Bohol sa nasudnong kampanya sa Presidente.

Kahinumduman nga buot ni Presidente Rodrigo Roa Duterte nga himoon usab sa mga local nga kagamhanan ang ilang mga gimbuhaton subay sa nagpadayong gubat batuk sa illegal nag drugas.

Sa dinhi ang Presidente, iyang giaghat ang mga opisyal sa kagamhanan nga iyang gamiton ang DILG aron suta-on kon naglihok ba usab kini batok sa illegal nga drugas.

Gibutyag sa Presidente nga dili niya kaya kon siya ra ang pasagdan sa gubat batok sa drugas nga karon may kinaiya nga nag-operate bisan sa transnational boundaries. (rahc/PIA-7/Bohol)    
Si Dangerous Drugs Board Chairman Catalino Cuy, mipadayag nga ang Purok Power Movement daku og gikatabang sa pagpadeklara ug pagminitor sa kabarangayan sa presensya sa drugas. (rahc/PIA-7/Bohol)

No comments: