Mas asensado nga mga manuwaay 

Gilauman, pagbukas sa BSAA 2018 

TAGBILARAN CITY, Bohol, August 7 (PIA)—Milaum ang nga tigpasi-ugda sa ika walo nga season sa Bohol Schools’ Athletic Association (BSAA) nga mas mapamaayo pa ang kalidad sa mga manunuwa gikan sa pribado nga mga tunghaan sa Bohol sa natad sa volleyball ug basketball. 

Kini samtang ang bugtong liga sa Bohol nga molibut sa mga kalungsuran magbukas na usab aron pagkaplag sa mga bantugan nga manuwaay sa basketball ug volleyball sa Bohol nga mahimong magdala’g garbo sa lalawigan sa mga nasudnong bangga. 

Malipayon usab nga gitaho sa Presidente sa kahugpungan nga sa katapusan nga liga, gipukan na sa Bohol ang powerhouse team sa Cebu sa duwa nga volleyball, dungog nga buot nila nga mapatunhay ning season. 

Gipasalig usab nila nga ang paliga, maglikay sa mga kabatan-onan sa mga illegal nga druga ug kriminalidad samtang hugot ang ilang palisiya subay niini, matud ni Holy Name University President Fr. Francisco Estepa. 

Ang HNU usa lamang sa mga sakop sa BSAA. 

Sa natad usab sa basketball, ikaduha pa gihapon ang Bohol sa Sugbo, nga may daghan nga kapili-an sa mga manunuwa, segun pa sa mga tigpasiugda sa BSAA. 

Usa kana sa ato nga mga tumong: makahimo og usa ka team nga makaharong sa team sa Sugbo, kinsa giila nga powerhouse sa basketball, matud pa ni BSAA Sports Commissioner Achiles Amores. 

Hinuon, sukad nga napalig-on ang BSAA, hinay-hinay na usab nga napakita ang Bol-anon nga katakus sa mga duwa ug paugnat sa kusog, taho sa mga opisyales sa kahugpungan. 

Gawas sa BSAA, aduna usab ipahigayon nga Provincial PRIvate Schools Athletic Association (PRISAA) nga apilan usab sa mo-champion sa BSAA batok sa mga teams sa uban nga mga private schools sa Bohol. 

Sa Agosto 11, Sabado, buksan na usab sa BSAA ang ika walo nga season pinaagi sa us aka parade ug sundan na sa mga duwa. 

Karong tuiga, inay pulos mga college nga nasulod sa seniors ug high schools nga sulod sa juniors division, apilan na sila sa 3 ka midget teams. 

Siyam ka Junior teams ang miapil karon nga season ug 7 ka seniors basketball team, matud ni Amores, didto sa Presscon nga gipatawag aron i-anunsyo ang pagbukas sa liga human sa Opening Program hiuman sa parade, didto sa University of Bohol. 

Sa volleyball, buksan usab karong tuiga ang bag-o nga boys ug girls divisions diin may 10 na ka teams ang makig-bugno sa katakus batok sa usag-usa sa liga nga molanat pa ngadto sa buwan sa Oktubre. 

Sa volleyball women, tulo ka teams ang magkabagat ug mag-ilog sa pwesto sa labing hawod samtang may upat ka team sa men sang magbunanalay aron isipon nga hari sa volleyball court ug moharung sa team sa Sugbo sa PRISAA Regional Meet pohon. 

Ang mga duwa sa BSAA, molibut sa mga tunghaan nga apil, lakip na ang out of own games sa Maribojoc, Antequeta, Tubigon, Trinidad ug Jagna. (rahc/PIA-7/Bohol) 

Mas hayag nga program alang sa bata-ong Bol-anon nga manuwaay sa paugnat sa kusog ang gisaad sa pagbukas sa Bohol Schools Athletic Association (BSAA) samtang gisaad sa mga tigpasiugda nga taktakon dayon sa mga liga ang manuwaay nga masayran nga migamit sa illegal nga durgas (rahc/PAI-7/Bohol)