Thursday, August 09, 2018

OWWA-7, nangdawat na og nominasyon 
alang sa ‘Search for Model OFW Family 2018’ 

TAGBILARAN CITY, Aug. 8 (PIA)--Nangdawat na karon og nominasyon ang Overseas Workers Welfare Administration (OWWA) Rehiyon 7 alang sa Search for Model OFW Family of the Year Awardees (MOFYA) 2018. 

Ang MOFYA award nagtinguha sa pag-ila sa mga bantogang nakab-ot sa mga Overseas Filipino Workers (OFWs) ug sa ilang pamilya agig pag-ila sa ilang kalamposan taliwala sa mga hagit sa pagpanarbaho sa gawas sa nasod. 

Sigun pa ni OWWA-7 Labor Communications Officer Eda Enclonar, bisan unsang religious organization, non-government organization (NGOs), People’s Organization (POs), OFW Family Circles (OFCs), ug community-based socio-civic organization ang mahimong mo-nominar og pamilya gikan sa rehiyon sa Central Visayas kansang pangulo sa panimalay usa ka OFW, ma land-based man o sea-based. 

Kinahanglan lamang nga ang OFW adunay di mo-ubos sa upat ka tuig nga work experience sa ubang nasod ug kasamtangan o kanhing ni-trabaho sa gawas sa nasod. 

Alang sa mga OFWs kaniadto, kinahanglang permanente na kining nanimuyo sa Pilipinas sa di molapas sa 10 ka tuig gikan sa petsa sa nominasyon, wala nagkupot og elective o appointive nga posisyon sa nasudnon ug lokal nga buhatan ug walay ‘derogatory’ o daotan nga record. 

Ang mga mananaog sa MOFYA pilion base sa mga mosunod nga kriterya: kamaayo o ‘wholesomeness’ sa pamilya sa OFW, ilang kalambigitan sa sibiko ug komunidad, mga kalamposan sa OFW o/ug miyembro sa pamilya sa larangan sa edukasyon, propesyon ug kalamposan sa pagdumala sa pinansyal sa pamilya. 

Usa ka mananaog gikan sa kategoryang land-based ug laing mananaog usab sa kategoryang sea-based ang pagapilion nga maoy mo-representar sa Central Visayas sa nasudnong kompetisyon. 

Ang nomination forms makuha sa OWWA Regional Welfare Office 7 nga nahimutang sa 2nd Floor, DOLE VII Building, Gorordo Avenue corner Gen. Maxilom Avenue, sa syudad sa Sugbo. 

Gitakda sa Agosto 17, 2018 ang katapusang adlaw sa pagduso sa nominasyon. (ecb/PIA7-Bohol)

No comments: