“Wa’y
ikapuli sa pangandam”
Chatto ngadto sa MMDRRMC
TAGBILARAN CITY, Bohol, August 6 (PIA)—“Wala gayu’y ikapuli sa
tukma nga pagpangandam.”
Kini mao’y unod sa giluwatan nga pagpa-ambit ni Gobernador Edgar
Chatto ngadto sa usa ka bahan sa Metro Manila Disaster and Risk Reduction
Management Council (MMDRRMC) nga ming-anhi sa Bohol aron makisayud sa mga
lakang nga gihimo sa mga tinugyanan aron makatubag sa mga panginahanglan sa
pagtabang sa mga biktima sa linug niadtong 2013.
Ang MMDRRMC, gilangkuban sa 16 ka mga syudad sa Metro Manila ug
usa ka munisipyo sa Pateros, buot makisayud gikan sa mga lalawigan sa Sugbo,
Bohol ug sa syudad sa Tagbilaran, aron mahatagan og ideya unsa’y ipahimutang
nga mga lakang aron matubag ang hagit sa gikahadlokan nga The Big One.
Ang The Big One, us aka gikahadlokan nga linug nga moigo sa
Metro Manila nga magagikan sa West Marikina fault ug gitagna nga mokalas sa
daghanan nga kinabuhi sa kaulohan.
Matud pa ni Gob Chatto, nakabentaha og dyutay ang Bohol niadtong
linug sa 2013 tungod kay pila ka bwan sa wala pa ang linug, napabarug na ang
Telephone and Radio Systems Integrated Emergency Response 117 (TaRSIER 117).
Ang TaRSIER 117 nakahimo na sa mga bansaybansay sa mga
kalungsuran sa Bohol pinaagi sa ilang walo ka training teams aron tudlo-an ang
mga barangay unsay mga lakang sa pagresponde sa mga emerhensya.
Butyag sa gobernador nga gihimo man gani ang mock training aron
pagseguro nga may tukmang standards sa training module nga makaabut sa
kalungsuran.
Gawas pa niana, gitumbok ni Gob Chatto ang Purok Power Movement
nga lig-on nga sistema sa sa pagpang-apud-apod sa hinabang bisan pa an gang
tanang serbisyo sa gobernor nga mosango sa mga kalungsuran tungod kay wala nay
tawo nga kasaligan sa barangay, nasulbad sa Purok Power.
Gawas sa pagsagubang sa katalagman, magamit usab ang purok sa
mga serbisyo sa kagamhanan sama sa kasanihan, serbisyo sa panghayupan,
pagpatuman sa mga programa sama sa pagpananum ug pagpakatap sa kasayuran batok
sa kriminalidad, saysay ni Chatto.
Ang PPM gisundog na karon sa tibuok nasud tungod sa kamaayo
niini alang sa mga lugar nga may tinabangay.
Dinhi sa Bohol, lahi usab ang nasinati nga paghiusa sa katawhan
aron magtinabangay, hinungdan nga dili lisud ipatuman ang mga pagpang-apud-apud
sa tabang, ingon pa sa gobernador.
Dugang niya, panahon sa katalagman, ang pagtumbok sa usa ka
Operations Center nga wala gyud niya biya-e, kini nakatabang sa pagpagawas sa
mga desisyon, bisan pa nga may matag adlaw nga briefing sa tanan nga miresponde
sa pagtabang.
Gikan sa Operations Center, mamnglakaw paingon sa mga lugar nga
respondehan ang bahan sa TaRSIER kauban ang mga miboluntaryo nga rescuers, ug
mopauli kini alang sa inadlaw nga mga briefing, dugang ni Chatto.
Dungan usab niini, bisan sa gi-ingon nga mas paspas nga
pagpahiuli sa Bohol tungod sa mga sistema nga napahiluna, misugyot si Chatt nga
dili mahimo nga sundogon na ang tanan.
Dili mahimo nga kopyahon ang kinatibuk-an nga lakang sa Bohol
tungod kay ang matag lugar, may mga kaugalingon nga kasinati-an og mahimong
dili haum ang matag sistema nga sundogon.
Hinuon, alang sa MMRDDMC, tambag ni Chatto, pangita og mga
nagkadaiyang paagi nga epektibo nga magamit sa unsay panginahanglan.
(rahc/PIA-7/Bohol)
No comments:
Post a Comment