Wednesday, September 26, 2018

AO nga magpakunhod sa presyo sa mga 
panaliton, gipagawas sa Malakanyang 

TAGBILARAN CITY, Sept. 26 (PIA)--Gipagawas kagahapon sa Malakanyang ang Administrative Order (AO) nga nagtinguhang mapadali ang proseso sa pag-angkat sa mga gikinahanglang pagkaon aron mapakunhod ang presyo sa mga panaliton ilabi na ang mga produktong pang-agrikultura. 

Nahisulod sa Administrative Order 13 nga gilagdaan niadtong Setyembre 21 ni Presidente Rodrigo Duterte ang pagtangtang sa mga administrative constraints ug sa gitawag nga ‘non-tariff barriers’ sa importasyon sa mga agricultural products. 

Pinaagi niini, mahimong dali na ang pagkuha og permit alang sa pag-angkat og mga bugas ug uban pang produktong pang-agrikultura sama sa karne sa baboy, karne sa manok ug uban pang poultry products ug mga isda. 

Ang isda ug uban pang seafood products, bugas, karne ug utanon ang gitudlong hinungdan sa 2.4 percentage points sa 6.4 percent inflation rate, matud pa sa National Economic and Development Authority (NEDA). 

Nahisulod usab sa AO 13 ang pag-iban sa ginabayran sa pagkuha og permit to import, pagpa-luag sa mga gipangayong requirements ug pagtangtang sa ubang proseso sa pag-angkat og mga produkto. 

Gihatagan og awtorisasyon sa Presidente ang National Food Authority (NFA) Council nga mag-apruba og dugang importasyon sa bugas nga lapas sa minimum access volume commitment sa pribadong sektor. 

Gimanduan usab niini ang Department of Trade and Industry (DTI) ug Department of Agriculture (DA) sa paghimo og tukmang lakang aron mahapsay ang logistics, transport, distribution ug storage sa mga agricultural products aron makuhaan ang gitawag nga ‘input costs.’ 

Gimanduan usab niini ang Bureau of Customs (BOC) nga padalion ang “unloading and release of agricultural products”. 

Samtang gitahasan usab sa Presidente ang DTI, NFA, National Bureau of Investigation (NBI) ug Philippine National Police (PNP) sa pagmugna og surveillance team, sa tabang sa pribadong sektor sa pag-monitor sa importasyon ug distribusyon sa mga agricultural products aron masiguro ang distribusyon sa mga warehouses ug retail outlets, malikayan ang ilegal nga buhat sa ‘price manipulation’ ug uban pang matang sa ‘unfair commercial practices.’ (ecb/PIA7-Bohol).

No comments: