DENR mirekomendar pagkiha sa 

wala magkibo sa easement zone 

Tagbilaran City, September 26, (PIA)—Girekomendar sa ahensya nga nagtutok sa pagpanalipod sa kalikopan ngadto sa Buhatan sa Ombudsman ang pagpasaka og kaso batok sa mga opisyales nga wala magpatuman sa pagpaguba sa mga estraktura nga mingsulod na sa 20 metros nga public easement zones. 

Kini ang tipik sa saysay nga ipaambit unta sa Department of Environment and Natural Resources atul sa gahin niini nga takna sa Regional Association of Development Information Officers sa Rehiyon 7 (RADIO-7) nga naghimog kombensyon sa Panglao. 

Ang DENR nga girepresentahan ni Nestor Canda, kinsa moa ang Chief of Staff sa Regional Director nga si Gilbert Gonzales, midason gayud nga subay sa Article 51 sa Water Code of the Philippines, walay gitugotan nga magtukod og bisan unsa nga estraktura sulod sa 20 metros gikan sa abton sa taub. 

Kahinumduman nga subay sa gimandu ni Presidente Rodrigo Duterte nga luwason ang ngakadunot nga kahimtang sa mga kabaybayonan sa nasud, mibisita si DENR Secretary Roy Cimatu sa Panglao niadtong Marso 17, 2018. 

Human sa usa ka buwan, o niadtong Abril 16, 2018, gipagawas sa DENR PENRO ang mga Notices of Violation ngadto sa mga nakalapas sa balaod. 

Pagkasunod adlaw, o Abril 17, 2018, nagkatigum dayun ang DENR u gang nga milapas sa balaod alang sa us aka Technical Conference. 

Pgka Abril 20, 2018, giduso sa DENR PENRO ang ilang listahan sa mga resorts sa Panglao nga nakit-ang nakalapas sa Water Code, ngadto sa munisipyo sa Panglao, pinaagi ni Matyor Pedro Fuertes. 

Niadtong Agusto 23, 2018, mismo si DENR RD Gilbert Gonzales nakigtagbo sa mga tinugyanan sa Panglao uban usab sa mga Regional Directors sa Department of Tourism, Environment Management Bureau, kagamhanang Probinsyal sa Bohol ug sa mga apektado aron iduso na gayud ang pagpang guba ug paghawan sa easement zone. 

Apan, dagway og wala pay sibug sa lakang, niadtong Agosto 30, si Michael Dino, ang luyoluyo sa Presidente dinhi sa Visayas misulat kang Panglao Mayor Pedro Fuertes aron ipatuman na ang pagpang guba sa mga illegal nga estraktura nga gipabarug sulod sa public easement zones, apan matud pa sa DENR, wala pa gihapon gipatuman. 

Segun sa obserbasyon sa DENR, ang LGU nagpanuko pa gihapon sa pagpagawas sa lagda sa pagpangguba, ilabi na sa kaso sa Panglao ug sa Bantayan sa Sugbo. 

Tungod usab sa matag-adlaw nga nasayang ug mahimong magdugang sa mga illegal nga nagyaka sulod sa easement zones, girekomendar na sa DENR ngadto sa Ombudsman ang pagpasaka og kaso sa mga hingtungdang opisyal sa kagamhanan. (rahc/PIA-7/Bohol)