Mga miyembro sa CAFGU, makadawat 

na og binuwang pinansiyal nga ayuda 

TAGBILARAN CITY, Dec. 11 (PIA)--Makadawat na og binuwang financial assistance gikan sa gobyerno ang mga miyembro sa Citizen Armed Force Geographical Unit (CAFGU). 

Base sa gilagdaang Executive Order No. 69 ni Presidente Rodrigo Duterte niadtong Disymebre 4, makadawat na ang mga miyembro sa CAFGU og P7,000. 

Kini alang sa buwan sa Nobyembre hangtod Disyembre ning tuig. 

Kadtong naa sa plantilya apan nipaubos pa sa pagbansay-bansay, makadawat og pro-rated nga bahin sa maong ayuda, matud pa sa EO. 

Ang pondo nga gamiton alang sa paghatag sa pinansiyal nga ayuda maggikan sa 2018 contingent fund. 

Alang sa tuig 2019, gitahasan sa Malakanyang ang Department of Budget and Management (DBM) nga tun-an ang paghatag og ayuda sa mga miyembro sa CAFGU. 

Ang Presidente mipagawas sa maong EO taliwala sa gihingosgang kampanya sa gobyerno batok sa terorismo ug komunistang insurhensya. 

Tuig 1987 sa dihang gitukod ang CAFGU ubos ni kanhi Presidente Corazon Aquino. (ecb/PIA7-Bohol)