BSP nipahimangno sa publiko batok

sa pekeng tanyag nga trabaho online

TAGBILARAN CITY, Bohol (PIA)--Ang Bangko Sentral ng Pilipinas (BSP) niadtong Lunes nipahimangno sa publiko kalabot sa malimbongong paggamit sa imahe ni BSP Deputy Governor Chuchi Fonacier aron sa pagtanyag og mga online nga trabaho.

Sa usa ka advisory, ang BSP niingon nga nakadawat sila og mga taho sa unsolicited Viber messages gikan sa sender nga naggamit sa litrato ni Fonacier, nga nagtanyag og mga trabaho sa usa ka e-commerce company nga adunay inadlaw nga kinitaan gikan sa P500 ngadto sa P5,000.

Gipahinumdoman sa BSP ang publiko nga ang mga bakanteng trabaho gibutang sa ilang website ug opisyal nga social media accounts.

Aron magbantay batok sa posibleng mga ilegal nga kalihokan, ang BSP nag-awhag sa publiko nga likayan ang pag-apil ug paghatag og personal nga impormasyon sa wala mailhi nga mga tawo.

Gi-awhag usab ang publiko sa pagsusi sa katinuod sa bisan unsang mga mensahe o transaksyon nga nag-angkon nga naglambigit sa mga personahe sa BSP, ug sa pagtaho sa dili awtorisado nga mga kalihokan ngadto sa BSP. (ECB/PIA7-Bohol)

Ang BSP nipahimangno sa publiko kalabot sa malimbongong paggamit sa imahe ni BSP Deputy Governor Chuchi G. Fonacier sa pagtanyag og online nga trabaho. (BSP/PIA)