CHED nipasidaan batok sa pekeng

online scholarship application

TAGBILARAN CITY, Bohol (PIA)--Gihimakak sa Commission on Higher Education (CHED) ang usa ka post nga gipakatap online nga nag-ingon nga ang komisyon nagtanyag og hangtod sa P120,000 nga mga scholarship sa umaabot nga mga estudyante sa kolehiyo, pinaagi sa online.

Ang post sa Facebook nag-ingon nga ang umaabot nga mga tinun-an sa kolehiyo makadawat og P120,000 nga scholarship assistance matag academic year kon sila motungha sa pribadong kolehiyo o unibersidad, ug P80,000 kon mopili sila og pampublikong institusyon.

Ang post nag-ingon nga ang deadline sa aplikasyon gitakda sa Hunyo 20, 2025. Naglangkob kini og usa ka giingong link diin ang mga estudyante makapadala sa ilang aplikasyon.

Ning bag-o lang, nipasidaan ang CHED sa publiko kalabot sa pagsabwag og bakak nga impormasyon kalabot sa mga scholarship ug mga programa sa tabang pinansyal.

Gihatagan og gibug-aton sa CHED nga ang tanang lehitimong anunsyo sa mga scholarship gi-post lang sa ilang opisyal nga website ug verified accounts sa Facebook ug X (kanhi Twitter).

Matud pa nga mahimo usab nga susihon sa publiko ang mga update pinaagi sa opisyal nga social media accounts sa Unified Student Financial Assistance System for Tertiary Education (UniFAST), usa ka attached agency sa CHED nga gitahasan sa pagpatuman sa Republic Act No. 10931 o ang Universal Access to Quality Tertiary Education Act. Ang opisyal nga mga panid sa UniFAST naglakip sa Facebook ug X. (ECB/PIA7-Bohol)

Nipasidaan ang CHED nga dili tinuod ug wala maggikan sa ilang official page ang nikatap nga post kalabot sa giingong CHED Scholarship alang sa mga magkokolehiyo. (CHED/PIA)