Road Safety gipanghingusgan

Paglikay sa disgrasya sa dalan

TAGBILARAN CITY, Bohol (PIA)—Gipanghingusgan sa Department of Health (DOH) Central Visayas ug sa DOH Bohol ang kampanya sa luwas nga mga kadalanan, samtang gipanawagan ang pagtinampohay sa mga lakang aron kamenosan kong dili man gyud mapa-undang ang disgrasya sa kadalanan, nga mingkutlo sa mga kinabuhi sa kasagaran mga kabataanb nga may hayag unta og kaugmaon.

Kauban ni Director Joshua Brilliantes, ang bag-o nga Regional director sa DOH, gihimo sa Bohol ang Road Safety Awareness Forum, aron kampanyahon ang katawhan sa pagpatuman sa mga kabag-ohan sa kina-iya aron makunhoran ang mga disgrasya.

Magmaneho nga luwas, mouli sa pamilya nga walay tatsa: Maghelmet, kalma, ayaw og gamit sa selpon samtang anaa sa karsada ug ayaw og gunit sa manibela o likay sa karsada kon maka-inom, aghat sa mga tinugyanan.

Segun sa datus nga gipa-ambit, dul-an sa 36 ka mga tawo ang nakabsan sa kinabuhi matag adlaw sa Pilipinas, kini tungod lamang sa pagkabangga, segun sa pagpadayag sa United Nations Children’s Educational Fund (UNICEF).

Gibutyag ni Dr Angelito Umali, sa UNICEF Philippines nga gani, sa mga pagka-angol nga ang kina-ingnan: pagkadisgrasya sa kadalanan, sa 2024, mikabat sa 37,674 ang kinatibuk-ang kaso.

Kini nagbutyag usab nga ang kini ang nag-una nga hinungdan sa pagkamatay sa mga kabataan nga nag-edad og 5-14 anyos ug sa mga 15-29 anyos.

Kasagaran nga mga kabataan nga anaa na sa mga tunghaan ug kadtong igo na ang mga panuigon nga makamaneho sa mga sakyanan, maoy permi nga biktima ug hinungdan sa mga disgrasya.

Gitumbok usab ni Alison Uy, Board Secretary sa mga kahugpungan sa mga nanag-iya og private motor vehicle inspections centers (PMVIC) nga daghan nga disgrasya sa kadalanan, mahimo nga mapugngan.

Subay sa gipadayag sa Philippine Statistics Authority, ang mga batan-on nga nag edad og 20-24 ang permi nga mahi-apil sa mga mangamatay tungod sa disgrasya gikan sa 2010 ngadto sa 2023, sobra sa napulo sa matag us aka gatus nga mamatay sa usa ka adlaw.

Sa katungod sa PMVICs, ang pag-inspect sa mga sakyanan kon kini kasaligan pa ba nga padaganon, magsolbad na nga daan sa daghang disgrasya nga mapugngan pa unta.

Sa laing bahin, sa mga katawhan, ang pagsunod sa sakto nga mga balaod sa kadalnan, magpalikay na sa pagpabiktima. (PIABohol)

MILAGDA SA PANAAD. Kapin sa us aka gatus ka mga tawo nga mitambong sa Road Safety Awareness Forum didto sa Bohol Cultural Center milagda sa ilang panaad sa mas luwas nga mga kadalanan, sa kalihukan nga gitambongan ni DOH Regional Director Joshua Brilliantes sa DOH 7. (PIABohol)