242 ka Bohol PUJ drivers 

nakadawat og P5K cash aid

TAGBILARAN CITY, Bohol (PIA)—Ang mga kwalipikadong public utility jeepney (PUJ) drivers sa lalawigan sa Bohol nakadawat og P5,000 cash relief assistance (CRA) gikan sa Department of Social Welfare and Development (DSWD) niadtong Mayo 13, 2026.

“Nagpasalamat ko sa gobyerno niining gihatag nga P5,000 nga hinabang. Gawas sa pang-gasolina, makapalit nasad ko ani og bugas ug pang sud-an,” matud pa ni Victor Siao, 59 anyos nga taga lungsod sa Dauis.

Usa si Siao sa 242 ka PUJ drivers nga giila sa Department of Transportation (DOTr) ug Land Transportation Franchising and Regulatory Board (LTFRB) nga nakabenepisyo sa hinabang pinansyal.

Ang payout activities nagsugod sa alas 6:00 sa buntag ug natapos sa alas 4:00 sa hapon nga gipahigayon sa Dampas Covered Court sa syudad sa Tagbilaran.

Ang maong aktibidad gi-implementar uban sa koordinasyon sa local government unit sa Tagbilaran ug sa LTFRB aron masiguro ang episyente ug organisado nga proseso sa paghatag sa hinabang pinansyal sa tanang unang batch sa mga kwalipikadong benepisyaryo.

Ang mga benepisyaryo lisensyado, rehistrado, ug awtorisado sa pag-operate sulod sa ilang tagsa-tagsa ka lokalidad ug ruta, base sa validation nga gihimo sa LTFRB-Regional Franchising and Regulatory Office.

Ang validated nga listahan sa mga benepisyaryo gi-endorso dayon sa LTFRB ngadto sa DSWD-7 alang sa pagpatuman sa payout.

Subay sa direktiba ni Presidente Ferdinand Marcos Jr., ang DSWD padayong nanghatag og P5,000 nga cash relief assistance sa mga kwalipikadong miyembro sa sektor sa transportasyon pinaagi sa Assistance to Individuals in Crisis Situation (AICS) program.

Ang inisyatiba nagtinguha nga matabangan ang mga drayber sa public utility vehicle (PUV) nga makasagubang sa mga epekto sa pagtaas sa presyo sa gasolina taliwala sa nagpadayon nga panagbangi sa Middle East. (ECB/PIA7-Bohol)

Usa si Victor Siao, 59, taga lungsod sa Dauis ug nag-drive sa multicab nga namasahero sa rutang Tagbilaran-Dauis via Totolan-Mariveles ang nakadawat og P5,000 cash relief assistance gikan sa Department of Social Welfare and Development (DSWD) niadtong Mayo 13, 2026 didto sa Dampas Covered Court sa syudad sa Tagbilaran. (ECB/PIA7-Bohol)