Average nga kadakoon

sa pamilya sa Bohol: 4

TAGBILARAN CITY Bohol (PIA)—Gikan sa 5.07, anaa na sa 4 ka tawo ang average nga kadakoon sa Bol-anon nga panimalay.

Kini ang napalutaw sa labing bag-o nga Bohol Poll 2026 nga gipadagan sa Holy Name University Research and Publications, sa survey nga nahitabo niadtog Marso 28 ngadto sa Abril 21, 2026.

Kini usab ang kasayuran nga gisuportahan sa Philippine Statistics Authority (PSA) sa ilang 2010 ngadto sa 2020 Census on Population and Housing (CPH).

Segun sa CPH sa 2020, ang average household size anaa na sa 4.3, 0.2 puntos nga diperensya gikan sa 2015 nga CPH kanus-a namatikdan sa PSA ang 4.6 nga average household size sa Bohol.

Niadtong 2010 nga CPH, natala ang 4.79 isip average household size samtang niadtong 2007, kini anaa pa sa 5.07.

Samtang nakit-an na sa mga ekonomista ang dinalian nga kaayohan sa mas dyutay nga sakop sa us aka bubong sa panimalay, aduna usab kini possible nga dili maayong resulta.

Ang dyutay nga average family size kasagaran magtumod ngadto sa mas arang-arang nga kinabuhi sa pamilya tungod kay mas dyutay man ang moambit sa kinatibuk-an nga kinitaan, mao nga mas maatiman ang pag-ugmad sa kinabuhi sa mga sakop niini.

Pananglitan, tungod sa kadyutay sap aka-onon, mas makatigum ang paliya alang sa mas maayong nutrisyon, pag-atiman sa kahimsug, ikapamuhunan, may daghang maayong kahigayunan sa kinabuhi ug mas makapaeskwela sa maayong mga kurso.

Sa kadyutay sa angay tutokan, ang mga ginikanan maka-atiman na sa mga bata sa pagtungha, nga mahimong moresulta sa maayong grado, mas daghang kahigayunan sa bansaybansay ug kapanarbahoan.

Apan, sa lain nga bahin, ang nagkadyutay nga family size sa taas nga lanat sa panahon, kini maghatag og hagit kon magka-edaran na ang mga tawo ug magkanihit na ang mga trabahante.

Gawas pa niana, moabut ang panahon nga mas daghan ang mga edadran nga magsalig na sa abag ug hinabang gikan sa kagamhanan, magkadyutay ang trabahante sa agrikultura, mga industriya, serbisyo sa goberno ug mahimong makapahinay sa ekonomikanhong pag-ugmad. (PIAbohol)