Bohol miduso na sa NWRB sa

Bulk water rights application

TAGBILARAN CITY Bohol (PIA)—Sa naduso na nga aplikasyon sa Bohol alang sa water rights sa Loboc ug sa Inabanga, minghangyo si Gobernador Erico Aristotle Aumentado sa National Water Resources Board (NWRB) nga unta aksyonan na kini.

Personal nga gihangyo ni Gob Aumentado ang Special Investigator III alang sa Water Rights Division sa NWRB, nga unta masugdan na og subay ang mga gipangduso nga mga dokumento alang sa technical appraisal kalabut sa aplikasyon sa Bohol sa water rights alang sa Loboc River ug Inabanga River aron masugdan na usab ang pag-inspect sa natumbok nga mga tinubdan sa tubig ug sa lugar niini, sa dili pa ikapagawas ang water permit.

Ang NWRB water permit, maoy pagtugot gikan sa NWRB sa paggamit sa mga tinubdan sa tubig dinhi sa nasud, apil na ang tugin nga kinahanglan pang bombahon, ug mga surface water sama sa suba ug lawa, alang sa commercial, industrial, ug gamit alang sa panimalay.

Kahinumduman nga ang Kagamhanang Probinsyal sa Bohol nagduso sa laraw sa pag-ugmad sa major bulk water supply project nga Bohol Bulk Water Supply Project (BBWSSP) ug opisyal nga tawgon nga Accelerated Water and Sanitation Project in Selected Areas (AWSPSA) aron makabaton og tibuok adlaw nga suplay sa igo nga tubig alang sa mga kalungsuran sa Bohol.

Ang proyekto gitumong aron solbaron ang kakuwang sa supply sa tubig sa mga residente ug gamit sa mga industriya sa nagkalapad nga negosyo sa mga lugar nga misagop sa turismo labi na sa cluster sa Loboc.

Lakip na sa proyekto ang pagtukod og bag-ong mga tinubdan sa tubig, treatment plants, ug mga pagkutay nga linya.

Ipatuman pinaagi sa hugna-hugna nga pamaagi, ang unang phase niini, magtutok sa 9 ka lungsod nga maapil sa cluster nga adto magkuha sa tubig sa loboc River.

Sa plano sa proyekto, gitumbok nga makahigop og 60 mil ka metro kubiko nga tubig alang sa mga kalungsuran nga nagpalibot sa syudad sa Tagbilaran apil na ang Dauis ug Panglao.

Gawas sa Loboc, gilaraw usab ang pag-ugmad sa tubig sa Inabanga ug mga silingan nga kalungsuran, samtang sa sunod nga mga hugna, apil na ang Ubay, Talibon, Loon, Calape ug Tubigon alang sa kinatibuk-an nga 500 million cubic meters per day nga supply sa tibuok Bohol.

Ang proyekto kabahin na sa $250 million World Bank grant sa Pilipinas ug gitunong alang sa Bohol ug sa Surigao, subay sa mga nahauna nga taho.

Niadtong 2025, gikataho nga nahimo na ang pre-appraisal missions sa proyekto samtang karong buwana giduso sa Bohol ang rights applications.

Karong buwana na giduso sa Bohol ang applikasyon sa water rights inubanan sanotaryadong application form, mga dokumento apil na ang hydrogeological survey.

Hinuon, subay sa proseso, may 30 ka adlaw pa nga posting aron makahigayon usab ang mga mosupak sa proyekto sa pagpadayag sa ilang mga punto.

Human sa 30 ka adlaw, maghimo usab ang NWRB sa teknikal nga appraisal ug inspeksyon sa lugar aron ilhon kon unsa kakasaligan ang tinubdan sa tubig ug ang epekto niini sa kalikopan. (PIABohol)

BOL-ANON ANG UNAHON. Gipadayag ni Gob Erico Aristotle Aumentado nga sa tanang mga proyekto sa patubig nga sugdan niini, ang Bol-anon mao ang unang makabenepisyo, ilabi na sa namatikdang kakuwang pa sa suplay sa limpyo ug igo nga tubig nga moabut sa mga hugasan sa mga Bol-anong panimalay. (PIAbohol)