Gobyerno mipahamtang og P50/kg price cap

sa imported nga bugas sa tibuok nasod

TAGBILARAN CITY, Bohol (PIA)—Mipagawas si Presidente Ferdinand R. Marcos Jr. sa Executive Order (EO) No. 118 nga nagpahamtang og P50-per-kilogram nga price ceiling sa imported nga bugas sa tibuok nasud sulod sa 30 ka adlaw aron mapugngan ang pagsaka sa gasto, malikayan ang pag-abuso sa merkado, ug maseguro ang barato nga suplay sa mga konsumidor.

Gibase ni Presidente Marcos ang direktiba sa rekomendasyon sa National Price Coordinating Council (NPCC) aron matubag ang dili makatarunganon nga pagsaka sa presyo, mapugngan ang pag-abuso sa merkado, ug masiguro ang pagkaanaa sa barato nga bugas samtang gipadayon ang kalig-on sa merkado.

Ang NPCC mopahigayon og periodic review sa pagpatuman sa price ceiling matag 15 ka adlaw ug irekomendar ngadto sa Presidente ang pagpadayon, pag-adjust o pag-lift niini base sa nag-una nga kahimtang sa merkado ug anaa nga datos kung gikinahanglan.

Nakalatid sa EO nga ubos sa Republic Act (RA) No. 7581 o ang Price Act, ang Presidente mahimong magtakda og pinakataas nga presyo sa mga importanteng butang kon irekomenda sa tukma nga ahensya o sa NPCC. Mahitabo kini panahon sa mga emerhensya, kung adunay pagkaylap nga iligal nga pagmaniobra sa presyo, kung ang mga panghitabo hinungdan sa kalit, dili patas nga pagtaas sa presyo, o kung ang mga presyo sa nag-unang mga palaliton mahimong taas kaayo alang sa mga konsumedor.

Base sa direktiba, ang Department of Trade and Industry (DTI) ug ang Department of Agriculture (DA) kinahanglang magsiguro sa estrikto, uniporme nga pagpatuman sa price ceiling, lakip na ang pagmonitor ug pag-imbestigar sa abnormal nga lihok sa presyo.

Ang Department of the Interior and Local Government (DILG) gimandoan sa paghatag sa gikinahanglang suporta alang sa implementasyon, samtang ang Bureau of Customs (BOC) mohimo og inspeksyon ug enforcement operations aron mabatukan ang hoarding, smuggling, ug illegal nga importasyon sa bugas, lakip na ang pagkumpiska, pagsakmit, o pag-forfeiture sa smuggled rice, kon gikinahanglan.

Ang Philippine Competition Commission, uban sa koordinasyon sa DTI ug sa DA, kinahanglang mohimo og tukma nga mga lakang batok sa cartelization, pag-abuso sa dominasyon, ug uban pang anti-competitive practices aron masiguro ang patas nga kompetisyon sa merkado ug mapanalipdan ang kaayohan sa mga konsumidor.

Samtang ang Philippine National Police (PNP) ug uban pang ahensya nga nagpatuman sa balaod kinahanglan maghatag sa gikinahanglan nga suporta aron masiguro ang dinalian ug epektibo nga pagpatuman sa mando. (ECB/PIA7-Bohol)

Gilagdaan ni Presidente Ferdinand R. Marcos Jr. ang Executive Order (EO) No. 118 nga nagpahamtang og P50-per-kilogram nga price ceiling sa imported nga bugas sa tibuok nasud sulod sa 30 ka adlaw aron mapugngan ang pagsaka sa gasto, malikayan ang pag-abuso sa merkado, ug maseguro ang barato nga suplay sa mga konsumidor. (PIA)