Kagamhanan sa Probinsya sa Bohol ug BISU

naglusad og digital tourism web app project

TAGBILARAN CITY, Bohol (PIA)—Ang Panggamhanan sa Probinsiya sa Bohol ug ang Bohol Island State University (BISU) pormal nga milagda og Memorandum of Agreement (MOA) nga naglusad sa pagpatuman sa LAAG Bohol web-app niadtong Mayo 18, 2026 sa Governor’s Office sa Provincial Capitol, syudad sa Tagbilaran.

Ang LAAG (Lifework Andragogy for Advanced Guides) Bohol web-app gilantaw isip usa ka sentralisadong plataporma nga nagkonsolida sa pagbansay sa turismo

Ang maong plataporma maglihok usab isip usa ka sistema sa pagdumala ug pagmonitor alang sa Bohol Provincial Tourism Office (BPTO) samtang makapahimo sa mga stakeholders nga makig-interact ug makahatag og feedback.

Ang MOA naglangkob sa inisyatibo nga gipundohan sa Department of Science and Technology (DOST) nga gidesinyo aron magsilbing sentralisado ug integrated digital tourism platform nga gitumong sa pagpausbaw sa mga kasinatian sa mga tour guide ug mga turista sa tibuok probinsya.

Gipangunahan ni Gobernador Erico Aristotle Aumentado ang seremonyas sa paglagda kauban ang Bise Presidente sa BISU alang sa Research, Innovation, ug Extension nga si Ivy Corazon Mangaya-ay ug BISU Balilihan Campus Director Marietta Macalolot. Nitambong usab sa maong kalihokan si BPTO Head Joanne Pinat.

Matud pa ni Aumentado nga positibo ang iyang panglantaw nga dako og ikatabang ang LAAG Bohol web-app sa direksyon sa pagpalambo sa turismo sa Bohol tungod kay usa kini ka centralized digital platform nga mas mapasayon ang sistema.

Nahiuyon sa Strategic Governance Roadmap sa Kapitolyo, ang inisyatiba nagpasiugda sa pasalig sa Panggamhanan sa Probinsiya sa paggamit sa digital innovation aron mapalambo ang malungtarong kalamboan sa turismo sa tibuok Bohol Island Geopark. (ECB/PIA7-Bohol)

Ang LAAG (Lifework Andragogy for Advanced Guides) Bohol web-app, usa ka Bohol web-app nga gipondohan sa DOST isip suporta sa turismo pinaagi sa paghatag og dugang giya ngadto sa mga tour guides ug sa mga manindot nga kasinatian ngadto sa mga turista sa ilang pagsuroy-suroy sa Bohol. (PGBh photo)