Pag-apod-apod sa 10 kilos nga bugas

ubos sa LGSF-FA nagpadayon sa Bohol

TAGBILARAN CITY, Bohol (PIA)—Ang Kagamhanan sa Probinsiya sa Bohol, pinaagi sa Office of the Provincial Social Welfare and Development Office (OPSWDO) nagpadayon sa pag-apod-apod sa 10 kilos nga bugas ngadto sa mga kwalipikadong benepisyaryo ubos sa Rice Distribution Program.

Ang programa gipundohan pinaagi sa Local Government Support Fund sa National Government–Financial Assistance to Local Government Units (LGSF-FA to LGUs) nga adunay kinatibuk-ang alokasyon nga ₱196 milyones.

Tungod kay dili kini igo alang sa tanan nga mga Bol-anon, usa ka porsyento sa populasyon ang gipili nga mga benepisyaryo, subay sa mga panudlo.

Aron madugangan pa ang mahatagan, ang Panggamhanan sa Probinsiya nihatag usab og P11-milyon nga counterpart fund, samtang ang mga partisipante nga local government units nigahin og dugang suporta aron mahatagan ang mga pamilya nga wala maapil sa inisyal nga listahan sa benepisyaryo.

Ang kagamhanang probinsiyal sa Bohol nihatag usab og P11-million counterpart fund, samtang ang mga partisipanteng local government units nigahin og dugang suporta aron pagtabang sa mga pamilya nga wala maapil sa inisyal nga listahan sa benepisyaryo.

Atol sa distribusyon sa bugas sa lungsod sa Cortes niadtong Mayo 20, 2026, si Gobernador Erico Aristotle Aumentado niingon nga ang mga benepisyaryo gikatakdang makadawat og hinabang sa upat ka distribution cycles ubos sa programa.

“Tungod sa mga hagit ug krisis nga atong nasinati karon, daghan ang naapektuhan ilabi na sa pagsaka sa presyo sa mga pamaliton. Busa, padayon ang among paningkamot nga mapaspasan ang rice distribution nga gipondohan sa national government aron dali kining maabot sa mga benepisyaryo sa nagkalain-laing lungsod,” matud pa ni Aumentado.

“Nagpasalamat ko sa atong gobyerno kay wala nagpasagad ning panahon sa kalisod,” matud pa ni Marcelina Hinay, 62 anyos nga taga Barangay San Roque, Cortes ug usa sa 1,157 ka mga kabus nga pamilya nga giila sa local government unit sa Cortes ang nakadawat og 10 kilo nga bugas.

Sukad Mayo 21, 2026, mikabat na sa 25,049 ka sako sa bugas ang naapod-apod sa mga kwalipikadong benepisyaryo gikan sa mga marginalized ug huyang nga sektor ngadto sa 13 ka lungsod sa Bohol aron matabangan sila sa pagsagubang sa inflation ug pagtaas sa gasto sa pagkaon.

Ang kagamhanang probinsiyal nagsugod sa pagpanghatag niadtong Mayo 14. Ang mga benepisyaryo gikan sa mga lungsod sa Panglao, Bien Unido, Sierra Bullones, Alburquerque, Loay, Baclayon, Cortes, Maribojoc, Garcia Hernandez, Anda, Ubay, Pilar ug Tagbilaran City nakabenepisyo sa maong programa sa bugas.

Ang rice distribution initiative magpadayon sa ubang mga lungsod sa tibuok Bohol sa umaabot nga mga adlaw isip kabahin sa tibuok probinsya nga implementasyon, nga mosakop sa upat ka distribution cycle matag duha ka bulan. (ECB/PIA7-Bohol)

Nikabat sa 1,157 ka mga kabus nga pamilya nga giila sa local government unit sa Cortes ang nakadawat og 10 ka kilo nga bugas matag usa ubos sa Rice Subsidy Program sa Cortes Amphitheatre niadtong Mayo 20, 2026. (ECB/PIA7-Bohol)