Telesafe Helpline gilusad sa DepEd

alang sa mental health sa mga estudyante

TAGBILARAN CITY, Bohol (PIA)—Gilusad niadtong Lunes sa Department of Education (DepEd) ang gipalambo nga Learners TeleSafe Contact Center Helpline - #33733 – aron maprotektahan ang kahimsog sa pangisip sa mga estudyante sa tibuok nasod.

Subay sa mga direktiba ni Presidente Ferdinand R. Marcos Jr. aron masiguro ang kalidad nga edukasyon ug kaayohan sa mga estudyante, ang helpline nagtumong sa paghatag og direktang link sa National Center for Mental Health (NCMH) Crisis Hotline.

Sa usa ka pahayag, si DepEd Kalihim Sonny Angara miingon nga ang mga estudyante nga adunay problema sa kahimsog sa pangisip mahimong maka-access sa gilayon nga interbensyon sa propesyonal ubos sa two-way referral system.

“Sa pag-uugnay ng ating #33733 Helpline sa mga dalubhasa mula sa NCMH, inilalapit natin ang kalinga at de-kalidad na healthcare sa bawat mag-aaral,” matud pa ni Angara atol sa paglusad.

“Dahil sa bawat tawag, tinitiyak natin na may katuwang sila tungo sa paggaling, kaligtasan, at panatag na kaisipan,” dugang pa niini.

Ang Learners Telesafe Contact Center Helpline mahimong makontak pinaagi sa #33733 (#DEPED), 09451759777 o pinaagi sa email weprotectlearners@deped.gov.ph ug Viber, alang sa mga distressed callers nga makonektar sa NCMH specialists alang sa expert crisis response.

Ang mga opisyal sa Learner Rights and Protection (LRP) sa DepEd maghatag og dinaliang giya ug assessment, samtang nagtubag sa dinalian nga mga butang ug nakig-alayon sa mga hingtungdang buhatan alang sa dali nga solusyon.

Sa laing bahin, ang DepEd nagkanayon nga ang programa dungan usab nga gipahigayon sa pipila ka mga tunghaan sa Kabisay-an ug Mindanao, nga nagdala sa serbisyo sa panglawas, lakip na ang mental health ug psychosocial support, nga mas duol sa komunidad sa eskwelahan. (ECB/PIA7-Bohol)

Mas gipakusgan pa sa Department of Education ang DEpEd TeleSafe Helpline #33733 karon nga aduna nay direct link niini sa National Center for Mental Health Crisis Hotline. Kini aron mapadali ang pag-konekta sa mga nagkinahanglan sa mga propesyonal nga andam motabang. Ubos sa liderato ni Presidente Ferdinand R. Marcos Jr. gilantaw usab sa DepEd ang mental health sa mga estudyante mao nga naghatag usab kini og suporta sa mga estudyante, ilabi na sa mga panahon nga ilang kinahanglan ang adunay maka-istorya ug mohatag og suporta. (DepEd photo)