Bohol 2nd place sa Reg’l Healthy Communities Awards
TAGBILARAN CITY, Bohol (PIA)--Nasakmit sa Bohol ang ikaduhang dapit sa Provincial Category sa Regional Healthy Communities Awards nga gipahigayon niadtong Hunyo 17 sa BAI Hotel, syudad sa Mandaue, Cebu.
Ang lalawigan nakadawat og plake ug ₱150,000 nga ganting salapi, nga nag-ila sa talagsaong performance sa pagtukod og himsog nga mga komunidad pinaagi sa epektibong promosyon sa mga programang panglawas.
Gidawat ang pasidungog alang sa lalawigan nila ni Provincial Health Office OIC Dr. Fruserma Mary Uy ug Health Education Promotion Officers Fritzie Olaguir ug Blyke Bantugan.
Samtang ang local government unit (LGU) sa Guindulman nahimutang sa ika-3 sa municipal category ug nakadawat og ₱100,000 ug tropeyo.
Nabutang sa top 3 ubos sa Healthy School Category ang Dimiao Central Elementary School ug nakakuha usab niini ang "Outstanding" nga rating nga adunay average nga marka nga 96%, diin nakadawat kini og ₱200,000 ug usa ka plake.
Ubos sa Healthy Learning Institutions—Last Mile Category, ang Lapsaon Elementary School of Dimiao nakuha ang Top 3 ug gihatagan og ₱100,000 ug usa ka plake.
Gihatagan usab ang maong tunghaan tungod sa pag-angkon niini og average nga marka nga 83% o usa ka “Very Satisfactory” nga rating, ubos sa Healthy School Category.
Dugang pa, ang Sikatuna ug Baclayon nabutang sa Top 5 sa “Good Practices” sa Health Promotion (GPHP) diin nakadawat kini og ₱50,000 ug plake matag usa alang sa tagsa-tagsa nila ka mga programa nga “Smoke-Free Sikatuna” ug “Mental Wellness Program.”
Ang LGU Loay giila usab isip Top 10 diin nakadawat kini og Certificate of Recognition alang sa inisyatibo nila nga “Tinabangay sa One Loay”.
Gihatagan usab og mga Certificate of Appreciation ang mga LGUs nga misalmot sa GPHP, lakip ang LGU Lila (“Adopt A Buntis Nanay Program” ug “SAVORY with Response”), Tagbilaran City (“Fit for Life Club”), Sevilla (“Project Juliet”), Talibon (“Echoes of Wellness,” “SchistoStop,” ug “Zero Tipok Kontra Lamok”), ug Mabini (“Empowered Youth, Planned Lives”).
Alang sa pag-apil sa Healthy Communities Awards, ang mga Certificate of Appreciation gihatag usab sa LGU Mabini, Candijay, Sikatuna, ug Tagbilaran City.
Ang Healthy Communities Awards nag-evaluate sa mga LGU gamit ang 39 ka standards ug indicators gikan sa nasyonal nga ahensya ug datos nga nakolekta sa LGU.
Gihatag ang pag-ila sa mga LGU nga nakab-ot ang labing menos 75% sa mga indikasyon matag domain, gi-categorize ubos sa usa ka tier system nga "Good" (75%) ug "Excellent" (95%).
Ang awarding gipahigayon atol sa 2025 Regional Health Promotion Summit nga nagdala sa tema nga “Empowering Communities for a Healthier Tomorrow.”
Ang summit nagtigom sa mga propesyonal sa panglawas, mga magbabalaod, ug mga lokal nga opisyal sa Central Visayas aron ipahiangay ang lokal nga paningkamot sa nasudnon nga Health Promotion Framework Strategy sa Department of Health (DOH). (ECB/PIA7-Bohol)
Nakuha sa Bohol ang ikaduhang dapit sa Provincial Category sa Regional Healthy Communities Awards nga gipahigayon niadtong Hunyo 17 sa BAI Hotel, syudad sa Mandaue, Cebu. Gidawat ang pasidungog alang sa lalawigan nila ni (L-R, 3rd-5th) Provincial Health Education Promotion Officer Fritzie Olaguir, PHO OIC Dr. Fruserma Mary Uy ug Health Education Promotion Officer Blyke Bantugan. (hulagway sa PiMO)
