Chatto gitudlo sa DOST 

nga SciTec ambassador 

TAGBILARAN CITY, Bohol November 14 (PIA)—Tungod sa aktibo niini nga pagpanginlabut aron mapa-asdang pa ang siyensya, teknolohiya ug mga bag-o nga imbensyon nga magpasayon sa dagan sa pag-ugmad sa nasud, gitunolan sa Department of Science and Technology si Gobernador Edgar Chatto sa dungog isip Science and Technology Ambassador. 

Didto sa pagbukas nga programa sa 2018 Regional Science and Technology Week nga naglatag sa mga science and technology innovations (STI) interactive exhibits, mismo si DOST Secretary Fortunato dela Peña ug DOST 7 Regional Director Edilberto Paradela ang mitunol sa pasidungog ngadto kang Chatto, kinsa usab nalipay sa iyang dugang nga gimbuhaton alang sa siyensya ug teknolohiya. 

Matud ni Chatto sa iyang pagdawat sa pasidungog isip ST ambassador, daan na nga may pagkiling siya sa siyensya ug teknolohiya. 

Giangkon sa gobernador nga sa iyang kabatan-on, niagi siya isip pangulo sa kahugpungan sa mga science clubs sa Bohol, ug hangtud karon, midason nga samtang nagdagan ang Bohol ngadto sa kaugmaran, mga palisiya nga gibase sa siyensya ug teknolohiya ang unang gabayan alang niini. 

Ang siyensya ug teknolohiya nagpalapad pa sa kalapdon sa kaugmaran, mao nga kinahanglan gayud nga kita mahisakay dinhi, saysay ni Chatto didto sa natapok nga katawhan sa Activity Center sa Island City Mall, Nobyembre 14. 

Gibutyag usab sa mga tinugyanan sa DOST nga sa nanglabay na nga mga panahon, sila migamit sa mga dagkong tawo ug sikat nga mga personalidad aron maoy magtulak sa dugang pag-ugmad sa siyensya ug teknolohiya sa mga dapit. 

Si Gobernador Chatto, nahilakip na usab sa dyutay nga mga ambassadors sa siyensya, teknolohiya ug innovation, sama na lamang ni Kenneth Cobonpue sa lalawigan sa Sugbo. 

Gitumbok usab ni RD Paradela nga si Chatto usa sa mga labing mainiton nga nagaduso sa mga programa ug serbisyo sa DOST, samtang gitukbil usab sa DOST ang pagpakig-alayonay sa Kagamhanan Probinsyal sa Bohol sa DOST ilabi na sa paghimo sa mga HEAT Caravans nga permi uban ang DOST. 

Sa iyang katungod, si Chatto namahayag usab nga isip host sa RSTW 2018, malipayon ang Bohol nga maghunahuna sa gikatampo sa Bohol alang sa nasudnong kaugmaran. (rahc/PIA-7/Bohol) 

AMBASSADOR SA SCIENCE UG TECHNOLOGY. Gidawat ni Gob Edgar Chatto ang hagit isip nasangunan sa responsibilidad nga ikapalapad pa ang siyensya ug teknolohiya dinhi sa Bohol sanglit kini karon ang magpakita kon unsaon niini magpapaspas ang kaugmaran. ANg pasidungog gitunol ni DOST Secretary Fortunato dela Peña ubang kang DOST 7 RD Edilberto Paradela. (rahc/PIA-7/Bohol)