Ika-13 nga CFLC building project, 

gitugyan sa BFAR sa LGU-Lila 

LILA, Nov. 15 (PIA)--Gitugyan na gahapon sa Bureau of Fisheries and Aquatic Resources (BFAR) ang Community Fish Landing Center (CFLC) sa lungsod sa Lila. 

Ang simbolikong yawe sa CFLC gitunol mismo ni BFAR 7 OIC Regional Director Dr. Nilo Katada ngadto ni Lila Mayor Regina Salazar. 

“Daku nakong kalipay mo-akseptar niini nga maong project alang sa pagtubag sa kapobrehon sa mga katawhan for I know Lila is a 5th class municipality nga ang atong source of income is fishing and agriculture,” matud pa ni Salazar sa iyang acceptance speech. 

Isip inahan sa maong lungsod, gipasalig niini nga ang maong edipisyo makahatag gayod og kaugmaran sa katawhan nga nagdala sa panguma ug pangisda isip ilang panginabuhian. 

Ang maong pasilidad nagkantidad og P2.5 milyones nga gilakipan sa mga ekipos sama sa stainless steel display stalls, ice-plant, chest freezers, ug uban pa. 

Matud pa ni Dr. Katada nga gawas sa ekipos ug mga kagamitang taban sa proyekto, mohatag usab ang BFAR sa mga bansaybansay aron magamit sa mga mangingisda'g mananagat sa ilang pagpadaghan sa ilang mga kuha. 

Kini maggarantiya og kanunay nga may lab-as ug baratong presyo sa mga isda sa maong lugar nga mapalit sa mga lumolupyo niini ug mga kasikbit nga lungsod. 

Matud pa ni Leo Bongalos, ang OIC Provincial Fishery Officer dinhi sa lalawigan sa Bohol nga ang CFLC sa Lila mao ang ika-13 sa 14 nga gitugyan sa BFAR sa nasudnong kagamhanan sa mga kalungsoran sa Bohol sa milabay nga tulo ka tuig. 

Ang CFLC usa sa mga interbensyon sa Department of Agriculture (DA) ilawom sa programang Targeted Action to Reduce Poverty and Generate Economic Transformation (TARGET). 

Kahinumduman nga ang mga CFLC gipundohan sa nasudnong kagamhanan pinaagi sa BFAR sa sistema nga abagay sa mga kalungsuran nga may maayong accomplishment sa mga programa nga gipatuman sa BFAR. (ecb/PIA7-Bohol) 

Gitunol ni BFAR-7 OIC Regional Director Dr. Nilo Katada ngadto ni Lila Mayor Regina Salazar ang simbolikong yawe sa CFLC atol sa blessing, inauguration ug turn-over sa maong edipisyo niadtong Nobyembre 14 sa Macalingan, lungsod sa Lila, Bohol. (ecb/PIA7-Bohol)