Local absentee voting, gitakda sa

Abril 29 – Mayo 1 sa Comelec

TAGBILARAN CITY, Nov. 16 (PIA)--Nagtakda na og petsa ang Commission on Elections (COMELEC) alang sa local absentee voting.

Base sa Comelec Resolution No. 10443, nakalatid nga mahimong mobotar ang mga mo-duty sa panahon sa piniliay ang mga kawani sa gobyerno, miyembro sa Philippine National Police (PNP) ug  Armed Forces of the Philippine (AFP), ug bisan ang mga sakop sa media gikan Abril 29 taman Mayo 1.

Matud pa sa COMELEC, ang mga opisyal sa gobyerno, militar, ug pulis mahimo lamang mobotar sa mga designated polling centers nga paga-ilhon sa ilang mga immediate supervisor o commander.

Samtang mahimo lamang mobotar ang mga sakop sa media kun asa  nga COMELEC offices sila mag-apply og absentee voting.

Gipahinumdom pa sa buhatan nga ang aplikasyon alang sa local absentee voting mahimo lamang isumiter hangtod sa Marso 11.

Alang sa mga sakop sa media, apil sa kinahanglang isumiter sa COMELEC ang certification gikan sa media entity nga ilang gi-alagaran.

Gikan sa alas-8 sa buntag hangtod alas-5 sa hapon sa mga nahisgotang petsa mahimong mobotar apan alang lamang kini sa mga posisyon sa senador ug partylist groups. (ecb/PIA7-Bohol)