Sakto nga pagpangandam sa 

Epic Challenge gikinahanglan

TAGBILARAN CITY, Bohol, November 15, (PIA)—Sakto’ng pangandam alang sa 2018 Bike Ta Bi Epic Challenge, kini maoy tambag sa mga tigpasiugda sa lumba sa mountain bike nga mahitabo karong Nobyembre 25, 2018.

Pangandami ang walo ka oras nga way bugto nga sikad, saka pakanaug sa mga tungason ug dulhugon, giantus ang pamaol, bikog, kaluya, kauhaw ug kagutom, ug labi na ang maayong kondisyon sa imong bisekleta.

Unya, ampo nga maayo og tyempo, kay kon mas dangug, doble ang imong konsentrasyon ug kun labihan ka init, mauga ka ug mapagtong sa ruta.

Magsugod sa Punta Cruz Maribojoc paingon sa Santo Rosario Antequera, San Isidro, Sampoangon Calape, Loon paingon sa Jandig Maribojoc balik sa Punta Cruz, ang Epic Challenge lumba sa bisekleta nga magtutok sa lahutay ug lig-on nga pagtinabangay sa mga kapares tadlas sa kapin kon kulang 85 kilometros nga barangay roads ug trails sa mga nahisgutan nga lugar.

Pagpangandam, dili lang sa kaugalingon nga pisikal nga pagbansay.

Pagpangandam na usab sa pagkaon ug tubig imnon lakip na ang nutrina pangpa-askil ug pang-paabtik kay may nga agi-an sa lumba nga walay makuha nga pagkaon ug mainum, aghat ni Gerry Marmito, usa sa mga tigpasiugda sa lumba.

Andama ang bisekleta, pulihi na nga daan ang pang-atras nga plato ngadto sa labing dako o bisan 34 ang ngipon, alang sa tag-as nga patungas sama sa Loon nagdto sa Tan-awan paingon sa Jandig, ug 

suwaye kon kasaligan pa ba ang brake, kay may mga padulhog nga mas makaayo kon kasaligan ang brake subay usab sa mga sumbanan sa cross country nga lumba, dugang niya.

Gawas nga dili makadagan sa lumba kon walay bike helmet, maayo usab nga may dala nga mga tapak, reserba nga interior sa ligid, ligwat, basic hex tools, bomba, sumpay sa kadena, dugang kadena, kwarta ug bisan unsa nga makatabang aron makalahutay sa 85 kilometros kapin kon kulang nga lumba sa bisekleta nga gipahiluna karong sunod Domingo na, Nobyembre 25.

Kon naa na ka niining tanan, dili pa kana igo.

Seguradoha nga ang imong kapares, sama kanimo, nangandam usab sa iyang kaugalingon, sa iyang gamit, sa iyang sakyan nga bisekleta, ug sa pagpalig-on sa iyang tuhod alang sa kinatibuk-an nga 2,345 ka metros nga kabukiran ug kabungturan nga saka-kanaugon.

Gikinahanglan usab ang bike computer apps nga naa sa imong android mobile phone kay kinahanglan nga may maipakita ka kon diin ka ug imong kapares mag-agi samtang misalmot sa lumba.

Dili usab itugot nga magbiyaanay sa lumba ang mga kapares: kinahanglan nga aduna permi silay visual contact ug dungan nga buhi-an gikan sa mga checkpoints, bisan kon kinsa kanila ng kapares ang mahiuna.

Mas lig-on nga paghigalaay, pagsaligay sa usag-usa ug paglahutay sa labing sakit nga lumba sa bisekleta, kini saysay sa mga naka-agi sa ruta nga dako og ikatabang nga makalampus.

Dul-an sa 150 ka bike pairs ang narehistro sa lumba ug gipaabut nga nianang adlawa, 300 ka mga tigbisekleta, marshals ug medics ang iladlad ug moagi sa 85 kilometros nga ruta diin may mga checkpoints nga maglista sa mga misalmot nga niagi ug nakahuman sa ruta nga naagi-an, aron dili ma disqualify.

Ang Epic Challenge, ang labing una nga endurance cross country bike race sa Bohol, usa sa mga labing bag-o nga paningkamot nga buksan ang extreme mountain biking isip bag-ong kapili-an nga sports tourism sa pagpalapad sa kaugmaran nga kasawhan sa tanang Bol-anon. (rahc/PIA-7/Bohol)

Ang BTB Epic Challenge motadlas sa mga kabukiran sa San Isidro ngadto sa Calape, Loon ug Maribojoc, gibantug sa mga hinayhay nga tungason nga makapaluya sa usa ka mountain biker. (PIABohol/hulagway sa BTB)