Tropical Depression nga gibantayan sa PAGASA,

mosulod sa nasod sa Domingo

TAGBILARAN CITY, Nov. 16 (PIA)--Padayon nga gibantayan karon sa Philippine Atmospheric, Geophysical and Astronomical Services Administration (PAGASA) ang duha ka dili maayong panahon nga naa sa sulod ug gawas sa nasod.

Ang low pressure area (LPA) na nagdala og mga pag-ulan sa Visayas ug Mindanao sa mga milabay nga adlaw nakagawas na sa Philippine Area of Responsibility (PAR).

Katapusang nasigpatan ang LPA sa gilay-ong 435 kilometro kasadpang bahin sa Puerto Princesa ug posible pa gihapong mahimong bagyo.

Samtang bisan nakagawas na sa PAR ang LPA, makasinati pa gihapon og madag-umon nga kalangitan nga may katag-katag nga pag-ulan, pagdugdug ug pagkilat ang tibuok Palawan ug Western Visayas.

Apan generally fair-weather o maayong panahon ang masinati sa nahabiling parte sa nasod gawas na lamang sa mga daling pag-ulan tungod sa localized thunderstorms.

Ug ang tropical depression usab nga naa gawas sa PAR katapusang nasigpatan sa gilay-ong 2,310 kilometro sidlakang bahin sa Mindanao.

Gipaabot kining mosulod sa PAR sa Domingo ug pangalanan og Samuel.

Matud pa sa PAGASA nga posibleng moabot sa Severe Tropical Storm category ang maong bagyo.

Gipaabot kining mo-igo sa rehiyon sa CARAGA sa adlaw nga Martes ug mo-agi sa Central ug Western Visayas ug Palawan. (ecb/PIA7-Bohol)