Mga kwalipikadong SSS members nga may monthly salary ₱10K paubos makadawat og hangtod ₱8K isip tabang gikan sa UPLIFT
TAGBILARAN CITY, Bohol (PIA)—Gipahibalo niadtong Miyerkoles sa Social Security System (SSS) nga ang mga kwalipikadong miyembro ubos sa gipalapad nga sakop sa UPLIFT Assistance program sa Department of Social Welfare and Development (DSWD) makadawat og pinansyal nga tabang nga moabot sa ₱8,000, sugod karong Oktubre 30, 2026.
Kini nga hugna sa pagpanghatag maglakip sa mga kwalipikadong miyembro sa SSS nga adunay monthly salary credits (MSC) nga dili molapas sa ₱10,000.
Ang UPLIFT Assistance naglangkob sa upat ka hugna (tranches) nga tag-₱2,000 matag usa, nga direktang i-kredito ngadto sa ilang narehistro nga SSS disbursement accounts.
Ang DSWD, inubanan sa SSS, nagpalapad sa programa aron maghatag og dugang nga tabang ngadto sa mga kwalipikadong miyembro nga adunay MSC nga dili molapas sa ₱10,000—dugang pa sa tabang nga kaniadto gitanyag na alang sa mga miyembro nga adunay MSC nga moabot sa ₱20,000.
Gipasiugda hinuon sa SSS nga ang pagbaton og MSC nga dili molapas sa ₱10,000 wala nagpasabot nga awtomatikong kwalipikado ang usa ka miyembro alang sa UPLIFT Assistance.
Aron mahimong kwalipikado, ang mga miyembro kinahanglan nga nakabayad og labing menos usa ka kontribusyon sa SSS sa tuig 2025 o 2026, ug kinahanglan usab nga nalakip sa database sa 2024 Community-Based Monitoring System (CBMS) sa Philippine Statistics Authority (PSA). Kinahanglan usab nga narehistro nila ang ilang disbursement accounts pinaagi sa SSS Disbursement Account Enrollment Module (DAEM) sulod sa gitakdang panahon.
Gi-awhag ang mga miyembro sa pagsusi sa ilang mga My.SSS account alang sa opisyal nga mga pahibalo mahitungod sa ilang kwalipikasyon alang sa UPLIFT Assistance.
Samtang ang mga kwalipikadong miyembro sa SSS nga adunay MSC nga ₱20,000 gikatakdang makadawat sa ikatulo ug ikaupat nga hugna sa UPLIFT Assistance—nga mokabat sa kinatibuk-ang ₱4,000—karong Nobyembre 6, 2026. Kini nagsunod sa malampusong pagpagawas sa DSWD sa una ug ikaduhang hugna sa tabang sayo ning tuiga.
Ang mga kwalipikadong benepisyaryo nga wala pa makadawat og bisan unsang UPLIFT Assistance makadawat sa kinatibuk-ang kantidad nga ₱8,000, nga naglangkob sa tanang upat ka hugna. Kadtong nakadawat na sa unang duha ka hugna, nga mokabat sa ₱4,000, makadawat og dugang ₱4,000 alang sa ikatulo ug ikaupat nga mga hugna. I-kredito kini nga dungan ngadto sa mga rehistradong disbursement account sa SSS sa mga benepisyaryo. (ECB/PIA7-Bohol)
Ang UPLIFT Assistance Program (Unified Package for Livelihood, Industry, Food, and Transport) usa ka inisyatibo sa nasudnong gobyerno alang sa pinansyal nga tabang, nga gipatuman uban sa koordinasyon sa SSS ug sa DSWD, aron pagtabang sa mga mamumuo nga ubos og kita nga makasagubang sa mga hagit sa ekonomiya. (SSS/ PIA7-Bohol)
