Palasyo: Tuition lang ang 

libre sa SUCs sugod sa 2017

MANILA, December 21 (PIA)--Gitataw sa Malakanyang nga tuition o matrikula lang ang libre sa mga state universities ug state colleges sa sunod tuig.

Matud pa ni Presidential Spokesman Ernesto Abella, may pagabayran pa gihapong miscellaneous fees ang mga estudiyante sa ilang pag-enrol sa mga tunghaang pampubliko.

Pasabot pa ni Abella, ang kapin P8.3 bilyon nga alokasyon o dugang sa budget sa Commission on Higher Education (CHED) alang lamang sa matrikula.

Giingong ipatuman ang libreng tuition sa mga state universities and colleges (SUCs) sa tibuok nasod sa school year 2017.

“The appropriation will cover the tuition of over 1.4 million students of 114 SUCs in the country and students will, however, still have to pay miscellaneous and other fees,” matud pa ni Abella. (ecb/PIA7-Bohol)

Exemption sa mga PWDs sa

VAT, magsugod na sa Biyernes

TAGBILARAN CITY, December 21 (PIA)--Sa dili pa moabot ang Pasko, mapahimoslan na sa mga persons with disability ang ilang exemption sa value added tax (VAT).

Matud pa ni Department of Social Welfare and Development (DSWD) Kalihim Judy Taguiwalo, namantala na sa mga pahayagan ang implementing rules and regulations sa Republic Act 10754 nga maghatag og exemption sa mga PWDs sa VAT.

Ubos sa RA 10754, exempted ang mga PWDs sa 12-porsiyentong VAT sa land transportation, domestic air ug sea travel, mga bayronon sa medical ug dental services apil na ang diagnostic ug laboratory fees, ug professional fees sa mga doktor.

Dakong tabang usab kini sa galastohon sa mga PWDs sa mga gipalit nga tambal.

Magamit usab sa mga adunay kakulian sa panglawas ang VAT exemption sa funeral ug burial services, sa serbisyo ug produkto sa mga hotel, rastaurants, sinehan, concert halls ug uban pa.

Ang maong balaod gawas pa sa 20-porsiyentong diskuwento nga gipahimoslan na karon sa mga adunay kakulian sa panglawas nga nakalatid sa "Magna Carta for Persons with Disability".

Samtang gipahinomdoman usab sa DSWD ang tanang mga establisimyento nga magbutang og mga karatula nga maghatag og kasayoran niining pribilehiyo sa mga PWDs. (ecb/PIA7-Bohol)

Mga ospital sa Bohol, nangandam na 

sa mga kaso sa aksidente sa paboto

TAGBILARAN CITY, December 21 (PIA)--Ang mga provincial ug district hospitals ning lalawigan sa Bohol nangandam na alang sa posibleng pagdaghan sa mga kaso sa firecracker-related injuries sa kasaulogan sa Pasko ug pagsugat sa Bag-ong Tuig.

Apan gi-awhag ni Provincial Health Officer, Dr. Reymoses Cabagnot ang mga Bol-anon sa paglikay na lamang sa pagpaboto sa panghinaot nga makonhoran, o dili kaha mawagtang na gayud ang aksidente nga may kalabotan sa pagpaboto. 

Sa niaging tuig, usa lamang ang reported nga kaso sa firecracker-related injury sa Bohol. 

Ganinang tunga’ng gabii, gipaubos ang tanang government hospitals sa Code White alert diin molanat kini gikan Disyembre 21 hangtud Enero 5 sunod tuig, base sa deklarasyon ni Department of Health (DOH) Kalihim Paulyn Jean Ubial kagahapon.

Ang maong alert nagpasabot nga tanang government hospitals kinahanglang andam 24 oras ug pito ka adlaw sa semana hangtud sa Enero 5.

Tungod niini, gipahinomdoman ni Dr. Cabagnot ang tanang opisyal sa mga provincial ug district hospitals sa Bohol nga tanang medical personnel anaa lamang gayud sa mga tambalanan aron moatiman sa mga emergencies.

Samtang gitugotan man ang pag-file og leave of absence, gipasabot ni Dr. Cabagnot nga giingnan man ang mga personnel sa pag-adjust sa ilang shifts aron pagseguro nga may maka-atiman sa mga pasyente, ilabi na kadtong maaksidente tungod sa paboto. (ecb/PIA7-Bohol)