DILG sa LGUs: pagtukod og BADACs, paggahin og 

pondo alang sa anti-drug campaign sa matag brgy.

TAGBILARAN CITY, December 22 (PIA)--Gimanduan sa Department of the Interior and Local Government (DILG) ang tanang local government units (LGUs) sa tibuok nasod nga maggahin og pondo alang sa anti-drug campaign sa matag barangay.

Base sa Board Regulation No. 4, Series of 2016 sa Dangerous Drugs Board (DDB), gihatagan og mandato ang 145 ka syudad ug 1,489 ka munisipalidad sa tibuok nasod sa paghatag og monitoring mechanism sa tibuok 42,036 ka barangays sa tibuok Pilipinas alang sa anti-drug abuse campaign sa gobyerno.

Sa matag barangay, kinahanglan usab nga magtukod og Barangay Anti-Drug Abuse Council (BADAC) nga pamunoan sa kapitan sa barangay ug pagalangkoban sa auxiliary team gikan sa mga kagawad, barangay tanod ug mga lupon.

Mismong mga kapitan sa barangay ang magtakda ug maggahin og pondong kinahanglanon sa BADAC sulod sa usa ka tuig ug iduso kini sa budget deliberation sa Konseho sa lokal nga kagamhanan.

Ang pagtukod og BADAC sa matag barangay nahisulod sa Memorandum Circular No. 2015-063 sa DILG nga gipagawas niadtong Hulyo 2015. (ecb/PIA7-Bohol)

Mga dili mosunod sa SRP, 

may multang mokabat sa P1-M 

TAGBILARAN CITY, December 22 (PIA)--Pahamtangan og multa sa Department of Trade and Industry (DTI) ang mga masakpang nagtinda og produktong nilapas sa gitakdang presyo niini o suggested retail price (SRP).

Mokabat taman sa P1,000,000 ang multa sa mga molapas niini.

Matud pa ni DTI Undersecretary Teodoro Pascua, maayo ug igo pa gihapon ang suplay sa mga produktong pang-Noche Buena mao nga walay rason aron pasakaan ang presyo niini.

Apan matud pa ni Pascua, kun may igong hinungdan o rason sa pagbutang og presyo nga nilapas o wala nisunod sa SRP, dili na pahamtangan og multa ang tag-iya. (ecb/PIA7-Bohol)

Expiry date sa mga produkto, 

hugtan na sa FDA sunod tuig

TAGBILARAN CITY, December 22 (PIA)--Sugdan na sa Food and Drug Administration (FDA) sa sunod tuig ang paghugot sa mga manufacturer nga dili gihapon tigbutang og “expiration” o “expiry date” sa mga de lata ug uban pang produkto. 

Kini tungod kay kadaghanan pa gihapon sa mga produktong mapalit ilabi na sa mga supermarket mga “best before o consume before” lamang ang nakabutang nga marka imbes nga expiration date.

Tuig 2014 pa gipagawas ang patakaran nga angay “expiration date” ang ibutang nga marka sa mga processed food ug dili “best before” lang.

Bisan wala dayon gipatuman ang bag-ong patakaran, gihatagan sa FDA ang mga manufacturer og panahon aron mosunod sa maong patakaran.

Gitataw sa FDA nga mahimo pa gihapong magbutang og “best before” apan angay adunay kaubang expiration date ang mga produkto. (ecb/PIA7-Bohol)

Mga bag-ong salaping papel nga may lagda 

ni Pres. Duterte, gipagawas na sa BSP

MANILA, December 22 (PIA)--Gipagawas na sa Bangko Sentral ng Pilipinas (BSP) ang mokabat sa P8.25 bilyong kantidad sa mga bag-ong salaping papel nga may lagda ni Presidente Rodrigo Duterte.

Matud pa ni BSP Deputy Governor Diwa Guinigundo, nagpagawas sila og 100 boxes nga adunay sulod nga P20, P50, P100, P500 ug P1,000 bills.

Ang matag box may sulod nga 50,000 ka mga bank notes.

Pasabot ni Guinigundo, ang matag denomenasyon adunay lima ka milyon ka bills nga ibutang sa sirkulasyon dili lamang sa National Capital Region (NCR) apan apil na usab sa Luzon, Visayas ug Mindanao.

Matud pa nga ang P200 bills may duha ka milyong bills lamang ang gipagawas tungod kay giingong ubos ang demand niini.

Gipagawas na ang mga bag-ong salaping papel sa mga bangko sa NCR ug mosunod na usab sa mga umaabot nga adlaw sa mga probinsiya.

Gi-klaro usab sa BSP nga walay kabag-ohan sa disenyo sa mga salapi ug security features gawas lamang sa pirma ni Presidente Duterte. (ecb/PIA7-Bohol)