2016, Best Year ni Presidente 

Duterte sa Asya – Japan Times



MANILA, January 6 (PIA)--Gi-anunsiyo ni Presidential Spokesperson Ernesto Abella ang pagkapatik sa Japan Times sa istorya­ sa Cable News Network (CNN) nga nagbida kang Presidente Rodrigo Duterte diin gihinganlan kini isip Asia’s Best Year.

Matud pa sa opisyal sa Palasyo nga ang Japan Times mao ang “most widely-read English language newspaper” sa Japan.

Ang CNN nihingan ni Presidente Duterte isip “big winner” sa Asya sa 2016.

‘For now, the Philippine leader’s unconventional moves seem a harbinger of things to come. This is no pivot to China, but a disruption of the old normal. Rodrigo Duterte ended 2016 seeking to rebalance his nation’s ties, improve the life of the average Filipino and make the Philippines — a one-time economic and trade powerhouse — great again’,” matud pa sa pahayag sa CNN nga gibasa ni Abella sa press briefing sa Malakanyang kagahapon.

Gihangop sa Palasyo ang maong pahayag ug matud pa ni Abella nga makapatandog sa dughan nga may pipila ka media agencies nga nakabantay sa mga maayong nahimo ni Presidente Duterte. (ecb/PIA7-Bohol)***Jan. 5 PCO release

ASEAN 2017 hosting, ilusad

sa Davao City sunod semana

MANILA, January 6 (PIA)--Opisyal nga ilusad sa gobyerno ang ASEAN Summit 2017 sa syudad sa Davao sa Enero 15 aron ipasabwag ang kaamogan kalabot sa pag-host ug ang mga benepisyo nga makuha sa atong nasod niini.

Matud pa ni Presidential Communications Operations Office (PCOO) Kalihim Martin Andanar, opisyal nga ilusad ang ASEAN Summit 2017 sa Davao SMX Convention Center ug ang PCOO nakigkumbuya sa nagkalain-laing ahensiya sa gobyerno nga gipangunahan sa Department of Tourism (DOT) aron magmugna og mga halandomong kalihokan.

Gidugang usab sa Kalihim nga ang PCOO ang lead committee sa media affairs and communications nga mopasabwag sa kasayoran ug edukar sa publiko kalabot sa ASEAN. 




Ang tema karong tuig sa ASEAN 2017 mao ang: “Partnering for Change, Engaging the World.”


Gibutyag usab ni Andanar nga mahimong i-summarize ang mga benepisyo nga atong makuha sa unom ka agenda sa pagpulong sa mga ASEAN leaders.

Una na niini ang paghimong “people oriented and people-centered” sa ASEAN diin himuong prayoridad ang kahimsog ug nutrisyon sa mga lumulupyo sa ASEAN ug ang social protection sa mga kababayen-an ug mga senior citizens.

Apil usab nga hisgotan ang “regional peace stability” diin tanang miyembro sa ASEAN magtinabangay aron mapatunhay ang kalinaw ug mahunong ang pagkatap sa mga ilegal nga droga ug terorismo.

Parte usab sa ASEAN meeting ang isyu sa “Maritime Security and Cooperation” diin hisgotan ang territorial dispute sa West Philippine Sea.

Apil usab sa hisgotan ang paghimong inclusive sa ASEAN alang sa sektor sa ekonomiya ug seguridad; “resilient ASEAN” o ang pagpakusog sa rehiyon batok sa mga kalamidad ug Climate Change. (ecb/PIA7-Bohol)***Jan. 5 PCO release

Benepisyo sa ASEAN 2017, maka-

abot sa mga pinakasuok nga lugar

MANILA, January 6 (PIA)--Giseguro sa Malakanyang nga walay sayangon nga sentimo ang Presidential Communications Operations Office (PCOO) aron makaabot sa pinakasuok nga parte sa nasod ang kamahinongdanon sa pagpahigayon sa ASEAN Summit 2017 dinhi sa nasod.

Matud pa ni PCOO Kalihim Martin Andanar, gamiton sa iyang buhatan ang Philippine Information Agency (PIA) aron mahatod sa grassroot level ang kasayoran kalabot sa ASEAN aron mapasabot kini sa matag Pilipino.

Dugang pa ni Andanar, mogamit ang PIA og mga komiks ug uban pang reading materials o basahon sama sa pampleta o mga pamphlets ug leaflets nga ipangapud-apod sa mga barangay aron masabtan sa matag Pilipino ang ASEAN 2017 ug kun unsa ang matabang niini sa nasod.

Gikumpirmar ni Andanar nga daghan pang lugar sa nasod ang dili maabot sa telebisyon, radyo, pamantalaan ug ilabi na ang social media o internet.

Ipahigayon ang kickoff sa Chairmanship sa Pilipinas sa ASEAN 2017 sa Enero 15 sa SMX sa syudad sa Davao samtang ipahigayon ang roadshow sa PCOO sa Enero 14 nga parte gihapon sa awareness program kalabot niini. (ecb/PIA7-Bohol)***Jan. 5 PCO release

Bol-anon nga naningkamot alang sa 

Drug Rehab center, gipasalamatan

TAGBILARAN CITY, January 5 (PIA)--Personal nga gipasalamatan ni sa usa ka taas nga opisyal sa kabinete ni Presidente Rodrigo Duterte ang usa ka Bol-anon, tungod sa dako nga tabang niini sa alang sa pagpahiluna sa usa ka pasilidad sa Bohol. 

Didto sa paglagdaay sa Memorandum of Agreement sa katukoran unya sa Bohol Drug Rehabilitation Center, gitumbok ni Cabinet Secretary Leoncio Evasco ang Bol-anon nga di Fernando Ding Borja nga maoy naningkamot nga kapundohana ng 500 ka kama nga center sa Bohol. 

Si Borja, miangkon nga Bol-anon, negosyante ug presidente sa usa ka mining firm, gitudlo usab ni Presidente Duterte nga special envoy ngadto sa nasud nga China. 

Matud ni Evasco, si Borja ang nanginguha nga makakaplag og Insik nga negosyante nga ika-abag sa Kausaban Foundation inc, arom magtukod sa pasilidad alang sa mga naa sa grabe nga kalango sa drugas dinhi. 

Segun sa MOA nga gilagdaan, ang Kausaban Foundation Inc na ang maghago aron ikapabarug ang Bohol Drug Rehab Center nga pundohan sa mga negosyante samtang ang kagamhanan mao ang magbutang sa mga empleyado ug ekipos ngagamiton alang sa pagpadagan sa pasilidad. 

Ang tukoron sa Bohol nga Drug Rehab Center, segun sa tinubdan gikan sa Department of Interior and Local Government, adto ipabarug sa sulod sa military reservation sa Carmen, Bohol. 

Kini maoy ikaduha nga Drug Rehab Center nga tukoron sa pagpadayon sa subsob nga kampanya ni Presidente Duterte batok sa ilegal nga drugas, butyag ni DILG Usec John Castriciones. 

Sa dili madugay, itukod usab ang ika tulo nga drug rehab center didto sa Mindanao, ug kini adto sa Zamboanga ipabarug gamit ang pundo gikan sa pribadong sektor, dugang ni Usec Castriciones. 

Gibanabana na ni Presidente Duterte nga sa ka grabe sa epekto sa ilegal nga drugas sa nasud, mokabat na ngadto sa 3.7 milyones ka Pinoy ang direktang apektado niini. 

Dugang niya, naa sa mga 8 ngadto sa 10% ang mga drug users nga nanginahanglan sa labing dali nga treatment og rehabilitation. 

Aduna lama'y 44 ka Department of Health (DOH) Accredited nga Drug Treatment ug Rehabilitation Centers sa nasud, ug mokabat lamang sa 6,000 ka pasyente ang mahimong silbihan niini. 

Niini, napalutaw ang kadaku sa panginahanglan alang sa dugang kadangpan sa mga misurrender ug nanginahanglan sa labing dali nag pagtambal. 

Dinhi sa Bohol, kapin sa 30,000 na ang mga drug personalities ang misurrender, ug sa 10% niini, nanginahanglan pag dugang DOH Accredited Drug Rehab Center, hinungdan nga nahimong dako ang gikatabang sa pagpaningkamot ni Borja.

Usa lamang ka Drug Rehab Center ang kasamtangang nagpadagan sa programa sa Bohol, ug kini naa sa lungsod sa baclayon, segun sa laing tinubdan. (rac/PIA-7/Bohol)

Kauban si Allan Crisologo ug ang negosyanteng mopundo sa Bohol Drug Rehab Center, si Fernando Borja (naglingkod nga nagsul-ob sa checkered nga long sleeves) maoy may dako nga tabang sa katukoran sa pasilidad sa Bohol nga moalagad sa 500 ka drug patients. Uban nila si DILG Usec Castriciones, DOH Secretary Paulyn Ubial, Gob Edgar Chatto ug Cab Sec Leoncio Evasco. (rac/PIA-7/Bohol) 

Duha ka Gallares Hospital sa duha ka tuig...

P555 milyones nga ospital

lahi sa P2.2B sa Cortes

TAGBILARAN CITY, January 5 (PIA)--Sukwahi sa gituohan sa kadaghanan, ang P555 milyones nga lima ka andana nga ospital sa Gallares, lahi pa sa P2.2 bilyones nga medical facility nga ipabarug didto sa Cortes. 

Kahinumduman nga gusubhan ang P555M nga proyektong lima ka andana nga hospital sulod mismo sa Gov Celestino Gallares Memorial Hospital Complex pinaagi sa yano nga groundbreaking ug paglubong sa kapsula sa mga plano sa proyekto nga ipatuman sa usa ka consortium sa mga kontraktor ug humanon sa duha ka tuig. 

Mismo si Department of Health Secretary Paulyn Jean Rossel-Ubial ang nanguna sa paglubong sa capsula nga gisudlan usab sa edisyon sa usa ka nasudnong mantalaan, samtang misaksi sila Cabinet Secretary Leoncio Evasco, Presidential Management Staff Assistant Secretary Erwin Enad, Department of Interior and Local Government (DILG) Under Secretary John Castriciones, Gob Edgar Chatto ug City Mayor John Geesnell Yap.

Sa paglusad sa proyekto, daghan ang naglibog kay nagtuo nga ang lima ka andanang hospital mao na ang itukod unta sa Cortes. 

Gani, daghan ang nangutana nganong ipadayon pa ang proyekyo nga tataw man nga wala nay igong lugar nga katukoran sa Gallares Hospital Tagbilaran City Complex. 

Gipasabut hinuon ni Dr. Mutya Kismet Macuno, Chief of Hospital sa Gallares nga ang gisubhan ug gihimoan sa ground breaking ceremony, usa ka bag-ong pasilidad nga gipundohan sa Hospital Enhancement Program sa DOH. 

Taban sa maong pasilidad ang 330 ka katre nga pasilidad nga may 16 ka operating rooms, mga Magnetic Ressonance Imaging og Computerized Tomography Scans, Ultrasound, ug kompletong Pedia, OB-GYNE ug parking spaces. 

May lain usab nga gipahat na ang kagamhanan alang sa P2.2 bilyones nga bag-ong hospital nga balhinan unya sa Gallares didto sa lungsod sa Cortes, butyag ni Macuno. 

Gani, human sa pagsubo nga kalihukan, milahos gilayon ang mga taga DOH uban sa mga opsiyales sa Bohol ngadto sa luna nga atukoran sa ospital sa Cortes alang sa Ocular Inspection. (rac/PIA-7/Bohol)

SI DOH Secretary Paulyn Jean Rossel-Ubial mismo ang nanguna sa paglubong sa kapsula nga gisudlan sa mga plano sa tukoron nga P555 milyones nga ospital sulod sa Gallares Complex. Gisaksihan usab kini ni Cab Sec Jun Evasco ug mga tinugyanan sa Gallares Hospital. (rac/PIA-7/Bohol)