P1,000 pension hike sa SSS, 

gi-aprubahan na ni Duterte 

MANILA, January 11 (PIA)--Gi-aprubahan na ni Presidente Rodrigo Duterte ang P1,000 nga dugang pensiyon sa mga retiradong miyembro sa Social Security System (SSS) sa tibuok nasod.

Kini ang gipahibalo ni Presidential Spokesman Ernesto Abella human gituki ang maong kontrobersiyal nga balaodnon sa gabinete sa Malakanyang kagahapon.

Apan gipasabot ni Abella nga kun may pagsaka sa pensiyon, giingong gipaabot na usab ang pagsaka sa kontribusyon sa mga empleyado sa pribadong sektor nga gikan 1.5 porsiyento hangtod sa 12.5 porsiyento.

Giingong nagpasabot kini og dugang kontribusyon sa kantidad nga gikan P15 hangtud P740.

Matud pa ni Abella nga wala nisugot si Presidente Duterte nga gamiton ang salapi sa mga magbubuhis aron pundohan ang pension increase tungod kay ang SSS usa man ka private pension fund.

Miingon si SSS President Emmanuel Dooc nga mahimong ipatuman na ang P1,000 nga dugang pensiyon sa sunod bulan tungod kay magpahigayon pa og "pag-recompute."

Samtang gipasabot usab ni SSS Chairman Amado Valdez ang parte sa P2,000 increase o ang kinatibuk-ang P1,000 ipatuman sa tuig 2022 o mas sayo pa. 

Mokabat sa 1.2 milyon ang mga pensioners sa SSS. (ecb/PIA7-Bohol)

“Very good” survey rating ni

Duterte, makapadasig – Palasyo

MANILA, January 11 (PIA)--Giingong makapadasig ang padayon nga taas nga survey ratings nga nakuha ni Presidente Rodrigo Duterte sa pinakaulahing Social Weather Station (SWS) survey diin nagpabiling ‘very good’ ang satisfaction ratings niini alang sa katapusang kwarter sa tuig 2016.

Matud pa ni Presidential Spokesperson Ernesto Abella sa press briefing sa Palasyo, nagpasabot lamang kini nga kuntento ang katawhan sa ginahimo sa gobyerno apil na ang giyera kontra droga.

Sa maong survey, nakatala si Presidente Duterte og 73% satisfaction rating batok sa 12% nga dili kuntento ug 15 porsiyento ang undecided gikan sa 1,500 ka adult respondents sa tibuok nasod.

Nigawas nga +61 porsiyento ang net satisfaction ratings sa Presidente sa SWS survey nga gipahigayon niadtong Disyembre 3-6 nga gikosiderar nga ‘very good’ pa gihapon.

Gihisgotan usab ni Abella nga bisan sa pinakaulahing survey sa Pulse Asia nga gipahigayon niadtong Disyembre 6-11, nagpabiling taas ang approval ug trust rating ni Presidente Duterte diin nakatala kini og 83 porsiyento. 

“The President's high rating continues to serve as a source of inspiration to the President and his official family," matud pa ni Abella. (ecb/PIA7-Bohol)

Katukoran sa drug rehab center 

sa Bohol, sugdan na karong tuig

BOHOL, January 11 (PIA)--Gitakdang sugdan karong tuig ang katukoran sa bag-ong Mega Drug Abuse Treatment and Rehabilitation Center sulod sa Camp Rajah Sikatuna sa Armed Forces of the Philippines (AFP) sa lungsod sa Carmen, ning lalawigan.

Usa ang lalawigan sa Bohol sa 5 ka lugar sa nasod diin sugdan ang pagtukod sa bag-ong drug rehabilitation center karong tuig.

Matud pa ni Cabinet Secretary Leoncio Evasco, ang tinubdan sa pondong mokabat sa P263 milyon nga itukod sa maong drug rehabilitation center maggikan sa China.

Gipasalig sa Cabinet secretary nga ang katukoran sa maong rehab center magsugod gayud karong tuig ug matud pa nga iya nang gitahasan si Ding Borja, ang special envoy to China nga usa usab ka Bol-anon sa pag-pinalisar sa kakuhaan sa pondo gikan sa China sulod sa duha ka bulan.

Kung mahuman na ang maong drug rehab center, makapasulod kini og 500 ka drug dependents.

Ang Bohol usa sa mga lalawigan sa tibuok nasod nga nakatala og pinakadaghang drug surrenderees mao nga kinahanglan gayud dayon ang usa ka drug rehabilitation center dinhi.

Sa katapusang ihap niadtong Nobyembre sa niaging tuig, dili moubos sa 25,000 ka drug users ang nitahan sa kapolisan sa Bohol ubos sa “Operation Tokhang.” (ecb/PIA7-Bohol)

P10-M budget alang sa BDJ expansion, aprubado na

BOHOL, January 11 (PIA)--Gi-aprobahan na sa Kagamhanang Probinsiyal sa niaging semana ang P10 milyong budget alang sa katukoran sa dugang selda sa mga bilanggoan sa Bohol District Jail (BDJ) sa Barangay Cabawan ning syudad sa Tagbilaran.

Sa pakighinabi sa usa ka lokal nga estasyon sa radyo dinhi, gibutyag ni BDJ Warden Jail Chief Insp. Rusylvi Abueva nga ang maong pondo gamiton sa pagpatukod sa dugang 10 ka selda sa mga bilanggoan. 

Matud pa ni Abueva, gipaabot nga sugdan sa ikatulong kwarter ning tuig ang maong proyekto samtang naghulat pa ang mga opisyal sa pinal nga approval sa desinyo sa maong pasilidad.

Giingong ang pagatukorong dugang selda makapasulod og 30 ngadto sa 40 ka binilanggo.

Sa pagkakaron, ang populasyon sa BDJ nga adunay 25 ka selda nikabat na sa 895 ka piniriso apan gi-desinyo lamang kini nga makapasulod og 400 ka binilanggo.

Gipaabot nga madugangan pa ang gidaghanon sa mga ma-preso tungod sa nagpadayon pa karong kampanya sa gobyerno batok sa ilegal nga droga. (ecb/PIA7-Bohol)

PCG Tagbilaran may

bag-o na nga hepe

TAGBILARAN CITY, January 10 (PIA)--Bag-o na ang hepe sa Philippine Coast Guard (PCG) Tagbilaran Coast Guard Station. 

Ang bemedalled nga opisyal nga mipuli kang Commander Benjie Quinisio kinsa mitapos sa iyang tour of duty niadtong hinapos sa Disyembre, mao si Lieutenant Junior Grade Jimmy Memdez Berbo. 

Si Berbo, kinsa gikan pa sa iyang makuyaw nga assignment sa Zamboanga, mituo nga mas sayon alng iyang assignment sa Bohol. 

Didto sa Zamboanga, nga maoy dunggo-anan sa mga ilegal nga palusot ug kansang kadagatan maoy sarang agi-anan sa mga ilegal nga negosyong kidnapping, naka-agi usab sa seige sa mga rebeldeng Muslim. 

Nakuha ni LTJG Berbo ang Coast Guard Outstanding Achievement Medal, PCG Superior Achievement Medal, PCG Meritorious Medal, Coast Guard Search and Rescue Medal, PCG Civic Action Medals, Disaster Relief and rehabilitation Medals, Commendations lakip na ang mga plake, ug letters of commendations. 

Gradwado sa Coast Guard Officer's Course niadtong 2009, nakuha ni Berbo ang iyang pagsulod sa kagamhanan human usab niya taposa ang kurso sa bachelos of Science in Computer Science sa Pangasinan State University-College of Arts and Sciences. 

Puno sa kasinati-an sa duty ma dagat man o sa opisina, si Lt Berbo nakaalagad sa Coast Guard Office of the Chief of Staff, Office of the Commander, National Capital Region Coast Guard District, Coast guard Operating Forces Office of the Commander, Office of the Vice Commandant (OVC) for Administration ug sa OVC for Operations 

Natudlo si Lt Berbo isip Operations Officer ug Acting intelligence Officer for Coast Guard Fleet, kansang trabaho mao ang pagdumala sa tanang barko ug assets sa PCG lakip na ang mga eroplano, K9 ug PCG Special operations Group sa tibuok kapupud-an. 

Sa LtJg Berbo una na nga nakighimamat ni Gob Edgar Chatto niadtong disyembre 22, atul sa Provincial Peace and Order Council Meeting didto sa Mansion. (RAC/PIA-7/Bohol)

Gihimamat ni Gob Edgar Chatto si LtJG Jimmy Berbo, bag-ong hepe sa PCG Tagbilaran PCG Station. Si Berbo may taas nga kasinati-an sa pandagat man, intelligence ug pangbuhatan nga gimbuhaton sa PCG. (rac/PIA-7/Bohol)

Pagkamabinantayon, aghat ni 

Aris taliwa sa hulga pamomba

TAGBILARAN CITY, Bohol, January 10 (PIA) --Gipakanaug ni Kongresista Erico Aristotle Aumentado ang pahimangnon ngadto sa mga Bol-anon sa pagmabinantayon taliwala sa hulga sa pagpamomba ug kaguliyang. 

Kini human masayri subay sa mga taho sa intelligence communities nga ang gipangita nga suspetsado sa pagpamomba sa Hilongos, Leyte, mahimong nia dangop sa Bohol. 

Tungod sa bukas nga mga ruta gikan sa Leyte paingon sa Bohol ug sa kadaghan sa mga gagmay nga mga sakyanan sa dagat ug pumpboats nga makadunggo sa nga magmay nga isla taiwa sa kadagatan sa Leyte ug Bohol, dili halayo ang posibilidad. 

Tungod usab niini, nanawagan si Kong Aris ngadto sa tanan sa pagsusi sa mga katawhan nga nia sa ilang mga silinganan aron mapadali ang pagdakop ug pagpatubag sa mga sad-an ngadto na sa hukmanan. 

"Palihug ko ug paki-susi sa atong Lungsod, Barangay o sitios sa inyohang lugar kung ana-a ba ni nga tawhana, hangyo ni Aumentado.

Ang panawagan ni Kong Aumentado nahihaum usab sa mga dagkong tapoktapos sa mga katawhan samtang nagpaabut sa nagsingabut nga kapisataha sa Santo Niño, ang patron sa Ubay, Getafe, Bien Unido ug uban pang mga kapistahan. 

Kahinumduman nga niadtong Disyembre 30, duha sa sunodsunod nga boto sa pagpamomba didto sa Hilongos ang mi-angol sa 34 ka tawo, lakip ang usa ka buntis ug menor de edad nga naa sa 7 anyos pa lamang. 

Naluwas hinuon ang Mayor ug iyang asawa kinsa nahimutang mga 12 metros gikan sa bomba, ug samtang nanan-aw sa usa ka boxing match isip kalingawan sa nagsingabut nga pista. 

Ang police Explosives and Ordnance experts didto sa crime scene nanakaplag og mga tipaka sa 80 mm nga mortar nga gigamit alang sa improvised explosive device nga gigamit sa pagpamomba. 

May kasayuran na ang mga otoridad nga ang bombaa, mahimong gikan sa Maguindanao.

Sa laing bahin, si Presidente Rodrigo Duterte midason sa iyang panaan nga lump[agon ang Abu Sayyaf didto sa New Year Command Conference uban sa Armed Forces of the Philippines (AFP) ug sa Philippine National Police (PNP) sa Malacañan sa miaging semana.
 

Subay usab sa hulga sa terorismo ug sa pagsabod sa kaguliyang, gitambag ni Presidential spokesperson Renato Abella nagdto sa mga Pilipino nga magbantay sa usag usa. (RAC/PIA-7/Bohol)