Japan ug Ph, milagda og pipila ka kasabotan

aron mapausbaw ang bilateral ties niini




MANILA, January 13 (PIA)--Gisaksihan nila Presidente Rodrigo Duterte ug Japanese Prime Minister Shinzo Abe kagahapon ang paglagda sa pipila ka kasabotan nga nagtinguhang mapausbaw ang kooperasyon tali sa duha ka nasod.



Una na niini ang tabang sa Japan nga mga high-speed boats ug uban pang ekipo sa counter terrorism alang sa Philippine Coast Guard nga nagkantidad og 600 milyon yen.

Usa ka Memorandum of Cooperation ang gilagdaan usab alang sa low carbon growth partnership joint crediting mechanism. Kini naglambigit sa pagmugna og joint committee aron pag-establisar sa basehanan diin ang Pilipinas ug Japan mag-promot sa investments ug ang gamit sa teknolohiya, product systems services ug imprastraktura aron makab-ot ang low carbon growth sa Pilipinas. 





Gilagdaan usab ang Memorandum of Cooperation tali sa Philippine Coast Guard ug Japanese Coast Guard nga tinguhang pamalambo pa ang maritime cooperation aron pag-promot sa maritime safety, security ug marine environment protection.
 

Ang Philippine Communications Operations Office ug Ministry of Internal Affairs and Communication of the Government of Japan nagbayloay usab og Memorandum of Cooperation alang sa proof of concept ug testing sa road traffic information system pinaagi sa data broadcasting. 





Gisaksihan usab sa duha ka lider ang pagbayloay og loan agreement alang sa Harnessing Agribusiness Opportunities through Robust and Vibrant Entrepreneurship Supportive of Peaceful Transformation.

Kining inisyatiba, 5 ka tuig nga proyekto sa Landbank of the Philippines, ang financial intermediary sa HARVEST nga magpondo sa eligible investments sa agribusiness enterprises farmers’ organizations. Gisalmotan kini sa Presidente sa Landbank ug sa chief representative sa Japan International Cooperation Agency (JICA).



Sa state banquet nga gi-andam ni Presidente Duterte, gipahayag ni Prime Minister Abe nga gikonsiderar niya ang Pilipinas isip usa ka pamilya ug dili lamang amigo o kaalyadong nasod. (ecb/PIA7-Bohol)

DTI, gi-andam na ang sistema alang sa 

pagpautang sa mga gagmay’ng negosyante

MANILA, January 13 (PIA)--Gi-andam na sa Department of Trade and Industry (DTI) ang himuong pagpautang sa mga gagmay nga negosyante base sa direktiba ni Presidente Rodrigo Duterte.

Usa ka micro-financing program nga pagatawgon og Pondo Para sa Pagbabago at Pag-asenso (P3) ang gitakdang ilusad sa DTI nga ihulip sa ‘5-6’ money lending system.

Matud pa ni DTI Undersecretary Teodoro Pascua sa Consumer Protection Group, target nilang unahon ang mga gagmay nga negosyante sa mga lagyong probinsiya kun padayon nang ipatuman ang bag-ong balaod.

Giingong ang pondo ipa-agi sa mga micro lending institution diin dili molapas sa 26 porsiyento ang interest sa usa ka tuig o dili mosaka sa 3 porsiyento matag bulan.

Gikan sa minimum nga P5,000 ug maximum nga P300,000 ang kantidad nga mahimong ipautang sa mga gagmay nga negosyante. (ecb/PIA7-Bohol)

Dugang kontribusyon sa SSS, legal

MANILA, January 13 (PIA)--Legal ug dili sayop ang ipatuman nga binulang dugang kontribusyon sa mga miyembro sa Social Security System (SSS). 

Kini ang gihimong pagtin-aw ni SSS Chairman Amado Valdez isip reaksiyon sa nahimong pahayag ni Senate President Pro Tempore Franklin Drilon nga ang pagsaka sa kontribusyon ilegal.

Matud pa ni Valdez, ang dugang kontribusyon nga ipatuman sa ahensiya alang sa mga miyembro sa umaabot nga bulan sa Mayo gamiton aron pasakaan ang Investment Reserve Fund, magbaton og mas dakong kita gikan sa investments ug hingosgan ang pondo sa SSS alang sa mga obligasyon niini sa mga umaabot nga tuig.

Giingong ang dugang P1,000 pension nga ipatuman karong Enero 2017 paga-pondohan sa kasamtangang kontribusyon ug kita sa investments.

Gitumbok ni Valdez nga gihimo nila ang tanang paagi aron mahatagan og maayong serbisyo ug benepisyo ang mga mi­yembro tungod kay mandato man kini sa SSS. (ecb/PIA7-Bohol)