21st Dairy Congress & 

Expo sa Bohol, gibuksan 

TAGBILARAN CITY, Mayo 23 (PIA)--Gibuksan karong adlawa ang ika-21 nga Dairy Congress and Expo sa Bohol Cultural Center ning syudad. 

Ang Dairy Conference of the Philippines ang nag-organisa sa maong kalihokan inabagan sa Kagamhanang Probinsyal sa Bohol isip host. 

Nagdala sa tema nga “Moving Towards Milk Self-Sufficiency,” ang maong expo gitambongan sa dul-an saysentos ka mga stakeholders apil na sa mga mag-uuma, magbabalaod, tigpamuhunan, government extension service providers, government financing institutions, processors, academe, estudyante ug mga konsumidor. 

Tinguha niining pasakaan ang productivity ug income o kita sa mga mag-uuma, dugangan ang base herd, maka-mugna og bag-ong market niche, ug maka-tampo sa sangon sa Department of Agriculture (DA) nga pasakaan ang milk sufficiency sa nasod gikan 1.8% ngadto sa 10 porsyento. 

Si Gob. Edgar Chatto sa iyang welcome message mipa-ambit ngadto sa mga sumasalmot ug mga pinasidunggang dinapit sa damgo sa lalawigan sa Bohol nga mamahimong ‘major dairy producer’ ug bisan mamahimong ‘dairy capital’ sa nasod, usa ka sangon nga gi-suportahan sa nasudnong kagamhanan pinaagi sa DA. 

Matud pa ni Chatto nga ang temang “Moving Towards Milk Self-Sufficiency” nisibo usab sa damgo sa lalawigan diin gidawat sa Bohol ang hagit sa maong programa nga nagpaingon ra usab sa maong direksyon. 

Sa pagkakaron, ang lalawigan sa Bohol maka-prodyus og 1,000 ka litro sa gatas matag adlaw ug target niining pasakaan kining produksiyon ngadto sa 10% matag tuig. 

Kining expo nagpahamutang usab sa mga mag-uuma sa Bohol sa strategic road map nga gisagop sa sektor sa agrikultura agig pagtinuod sa damgo sa pag-tanspormar sa Bohol paingon sa ‘dairy capital’ sa nasod. 

Gipangunahan ang pagbukas sa 21st Dairy Congress & Expo nila Dairy Confederation of the Philippines chair Isidro Albano ug National Dairy Authority Administrator Marilyn Mabale inubanan sa mga pinasidunggang dinapit nga sila si Israeli Ambassador to the Philippines HE Dr. Effie Ben Matityau ug Canadian Trade Commissioner Angel Cachuela. (ecb/PIA7-Bohol). 

Gibuksan ang tulo ka adlaw nga 21st Dairy Congress and Expo nga nagdala sa tema nga “Moving Towards Milk Self-Sufficiency” sa Bohol Cultural Center ning syudad sa Tagbilaran. (ecb/PIA7-Bohol).