BOC, may bag-ong sistema sa pag-monitor 

sa mga mosulod nga kargamento sa nasod

TAGBILARAN CITY, Mayo 18 (PIA)--May bag-ong sistema karong gipatuman ang Bureau of Customs (BOC) alang sa ilang monitoring sa mga mosulod nga mga kargamento sa nasod.

Kinahanglan nang moduso ang mga airline ug shipping lines sa BOC og advance cargo manifest.

Tuyo niining bag-ong lakang nga mapaayo ang dagan sa transaksiyon ug malikayan ang pagsulod sa nasod og mga ilegal ug delikado nga mga kargamento.

Ubos sa Customs Memorandum Order (CMO) 6-2018 nga gilagdaan ni Commissioner Isidro Lapeña nga gi-isyu ug nahimong epektibo niadtong Mayo 7, gi-obliga niini ang pagduso pinaagi sa PDF file og advance manifest, bill of commercial invoice, packing list, storage plan ug uban pa sa Advanced Manifest System sa BOC.

Ang Cargo Manifest o Inward Foreign Manifest (IFM) ang nagsulod sa mga kargamento sulod sa mga eroplano ug barko apil na ang impormasyon sama sa consignors ug consignees.

Sigun pa kang Lapeña, ang bag-ong sumbanan maghatag og dalan aron ma-proseso ug mahibaw-an ang custom duties, taxes ug uban pang bayronon sa dili pa moabot ang shipment. (ecb/PIA7-Bohol).