BSP mipahibaw sa pagpakatag 

sa mga bag-ong mga sensilyo 

TAGBILARAN CITY, May 24 (PIA)—Karon pa lamang, mipahibaw na ang Bangko Sentral ng Pilipinas (BSP) nga gisugdan na nila ang pagpa-ila sa bag-ong sensilyo nga ipakatag alang sa patigayun bisan pa nga sa Hulyo pa pohon ang pormal ug opisyal nga lusad niini. 

Kini maoy gipahibaw sa BSP pinaagi ni Information Officer Hazel Cultura, kinsa nangunay gayud sa pagtabok nganhi sa Bohol alang sa pagkampanya sa pagpahibaw subay niini. 

Ang BSP, kansang nag-unang misyon mao ang pagpatunhay sa stable nga presyo ug magpadangat sa usa ka balance ug tunhay nga kalambu-an, natahasan usab sa pagduso ug pagpreserbar sa kaligdong sa kwarta ug sa kapasidad sa katumbas nga baylo sa nasudnong salapi, midugang sa pagpasabut nga ang sensilyo nga nagkatag karon sa patigayun, duka na ka dekada. 

Segun sa charter sa BSP, ang sensilyo, mahimo nang kuhaon sa sirkulasyon human sa 10 ka tuig. 

Gawas pa, ang napabag-o nga sensilyo migamit na sa mas gipamaayo nga teknolohiya sa nickel-plating ug mga bag-ong security features aron mas lisud na nga kopyahon sa mga counterfeiters. 

Hinuon, una na nga gipagawas sa BSP ang kampanya kabahin sa bag-ong sensilyo dala sa possible nga malinga pa ang mga tawo dala sa bag-ong features niini. 

Unom ka sensilyo ang nasulod sa new coin series: P10, P5, P1, .25 sentimo, .5 sentimo ug .1 sentimo: ang tanan pulos sinaw nga puthay apan may nickel plating, segun pa ni Cultura. 

Giangkon usab sa BSP nga medyo lisud ilhon ang bag-ong sesilyo tungod ka usa na lamang ka color niini, apan kinahanglang nga suhetohon na gayud sa katawhan aron dili malipat. 

Gipakita ni BSP information officer Hazel Cultura ang mga bag-ong sensilyo samtang gipakatag ang kasayuran kabahin sa una-unang pagpakatag niini aron magamit na sa patigayun bisan pa nga sa Hulyo pa ang opisyal nga paglusad sa paggamit niini. (rahc/PIA-7/Bohol)