CebuPac, may tanyag nga ‘Cadet Pilot Program’ 

alang mga gustong mamahimong piloto 

TAGBILARAN CITY, Mayo 25 (PIA)--Gipahibalo karon sa Cebu Pacific Air nga nangdawat na sila og mga aplikante alang sa mga gustong mamahimong piloto sa ilang kumpanya pinaagi sa usa ka training program sa nasod sa Australia. 

Kalabot niini, nanawagan ang Cebu Pacific sa mga Bol-anon nga gustong mamahimong piloto sa pag-apil sa ilang pagbansay pinaagi sa ilang programa nga Cadet Pilot Program 

Gibutyag ni Charo Lagamon, Cebu Pacific corporate communications director nga kining ilang programa gilusad niadtong niaging tuig ug gitanyag pinaagi sa “study now, pay later” scheme. 

Matud pa ni Lagamon nga nakadawat na sila og mga aplikasyon gikan sa nagkalain-laing mga lugar sa nasod apan wala pa’y gikan sa Bohol. 

Ubos niining programa, ang Cebu Pacific inisyal nga mo-abaga sa mga gastos sa pagbansay diin pagabayran ra usab kini sa kadete og amortisasyon pinaagi sa salary deductions nga may maximum period nga 10 ka tuig. 

Ang mga madawat nga kadete mopaubos sa 52 ka semanang pagbansay sa Flight Training Adelaide (FTA), usa ka aviation school sa Australia nga ka-kumbuya sa Cebu Pacific. 

Kining programa bukas sa mga Pilipino nga nakatapos sa kolehiyo, haniti sa English ug adunay passports nga balido sa dili moubos sa duha ka tuig sa pagsulod sa programa. 

Ang mga interesadong aplikante mahimong mo-apply online pinaagi sa bit.ly/CebCadetPilots nga maoy magsugod sa tulo ka lakang nga selection ug screening process sa mga aplikanteng kadete. 

Ang Cebu Pacific nigahin og $25 milyon alang sa pagbansay sa 250 ka cadet pilots sa mosunod nga lima ka tuig nga mamahimong labing unang opisyal ug mamahimong kapitan sa kumpanya sa umaabot. (ecb/PIA7-Bohol).