DOE nangita og paagi kakubsan 

ang epekto’s pagmahal sa lana

TAGBILARAN CITY, May 24 (PIA)—Sa nagpadayon nga tandugong kahimtang sa pipila ka nasud nga tinubdan sa lana sa Middle East, sa politikanhng mga suliran sa mga dagkong tinubdan sa lana sama sa Valenzuela, Nigeria ug Libya, sa pagpakubos sa production quota subay sa mandu sa Organization of Petroleum Exporting Countries (OPEC), ug sa nagkadaku nga demand sa oil, nagpadayong gibati sa Pilipinas ang pagtaas sa presyo. 

Subay mga taho sa International Energy Agency (IEA) ug sa Mean of Platts Singapore (MOPS), ang oil supply ug panginahanglan niini sa dali og dugay nga panahon moabut pa sa $80 matag barel.

Apan, taliwala niini, gibutyag sa Department of Energy (DOE) nga ilang gipadayon ang pagpangitag nga lakang nga kakubsan ang sakit nga epekto sa bati nga sitwasyon sa lana ngadto sa mga konsumidor. 

Matud sa DOE pinaagi ni Secretary Alfonso Cusi nga gitanyag na sa mga kompanya sa lana dinhi sa nasud ang ilang kasibut nga mohatag og mga diskwento samtang palapdan pa ang mga programang corporate social responsibility (CSR) aron tabangan ang naa sa sector sa panakayan ug sa mga kabus. 

Dugang ni Cusi nga ila nan nga tibawason sa labing dali nga panahon ang Memorandum of Agreement (MOA) tali sa DOE ug mga konpanya sa lana alang niini. 

Kasamtangang tulo ka kompanya pa sa lana ang naghatag og P1.00 nga diskwento subay sa lain ug nahauna nga MOA sa DOE, taho ni Cusi. 

Kauban sa Department of Finance, padayon usab nga gisabut-sabutan nila sa DOE ang mga bag-ong paagi kabahin sa pagpatuman sa excise tax ug value-added tax sa lana subay sa pagpatuman sa Tax Reform for Acceleration and Inclusion (TRAIN) Law.

Ipadayon usab sa DOE ang pakigtali sa Department of Transportation aron sa labing dali, ikapatuman na ang Section 82 sa TRAIN Law kabahin sa paghatag og fuel vouchers alang sa Public Utility Vehicles (PUVs), samtang tabangan ang ahensya sa panakayan sa tumong niiining pab unbundle sa presyo sa gasoline.

Dugang niana, gipadayon sa DOE-Oil Industry Management Bureau (DOE-OIMB), subay sa mandu ni Energy Secretary Alfonso Cusi, ang ilang pinakalit nga inspeksyon sa mga gasolinahan aron pagseguro nga ang kalidad maayo ug ang gidaghanon sa gipatubil sibu gayud sa gibayran. (rahc/PIA-7/Bohol)

Si DOE Sec Alfonso Cusi nanguna sa kagamhanan sa pagpangitag alibyo sa giping-it nga kalisud sa katawhan human nasinati ang global oil crisis dungan pa sa pagpataw sa bag-ong pamuhis nga nakaapekto sa presyo sa gasolina ug pletehan sa mga manakayay. (rahc/PIA-7/Bohol)