DSWD mitataw: Walay 5Ps 

TAGBILARAN CITY, Mayo 22 (PIA)--Gikorehian sa Department of Social Welfare and Development (DSWD) sa Central Visayas ang sayop nga kasayoran nga gipakatap karon kalabot sa field validation alang sa implementasyon sa Unconditional Cash Transfer (UCT) program. 

Matud pa sa information officer sa Pantawid Pamilyang Pilipino Program, nakadawat ang ilang buhatan og kasayoran nga ang mga households nga nipaubos sa field validation, awtomatiko kunong maapil sa 4Ps. 

Sa bag-o lang gipahigayong panagtapok sa Association of United Development Information Officers in Bohol (AUDIO-Bohol) niadtong Mayo 10 sa Panda Tea Gardens nga gi-host sa DSWD, gibutyag ni Kerwin Macopia nga ang ubang espekulasyon nagkanayon nga ang maong validation parte usab sa bag-ong programa nga 5Ps. 

Gitataw ni Macopia nga wala silay nadawat nga memorandum nga naglibkas sa moratorium sa expansion sa 4Ps ug wala usab sila’y programa nga 5Ps. 

Gipasabot sa tigpamaba sa 4Ps nga ang nagpadayong field validation karon, eksklusibo lamang alang sa 3 ka tuig nga programa sa UCT nga gituyo sa paghatag og cash grants ngadto sa 10 ka milyong kabos nga pamilya. 

Ubos sa UCT program, ang mga benepisyaryo makadawat og P200 nga binuwang subsidy alang sa tuig 2018 ug P300 nga binuwang subsidiya alang sa tuig 2019 ug 2020. (ecb/PIA7-Bohol). 

Gikorehian ni Kerwin Macopia, 4Ps information officer ang sayop nga kasayoran nga gipakatap karon kalabot sa UCT program ug ang giingong bag-ong programang 5Ps atol sa 5th General Assembly sa AUDIO-Bohol didto sa Panda Tea Gardens niadtong Mayo 10. (ecb/PIA7-Bohol).