Mga tulay nga gitrabaho

mahuman sa Agosto 2018

TAGBILARAN CITY, May 8 (PIA)--Sa Agosto 2018 pa mahuman ang mga tulay nga karon kasamtangan pang gitrabaho bisan pa nga gitarget unta nga mahuman sa Hunyo 2017 pa.

Ang mga tulay nga humanonon pa, mao ang mga tulay sa Hinawanan Loay, Palo, Loay, Anislag Maribojoc, Hunan Buenavista ug Dimiao Buenavista lakip na ang ayohonon sa Bateria Tubigon.

Gisugdan pagtrabaho niadtong Hulyo 2016, ang mga tulay, nalakip sa cluster nga gibid og nakuha sa contractor nga taga Leyte ug una na nga gitumbok nga matapos na unta sa Hunyo 2017 human sa usa ka tuig, segun pa sa Department of Public Works and Highways (DPWH).

Nakabagat og mga suliran ang mga tulay dala sa panginahanglan sa pag areglo sa detours, sa pagpalig-on sa humokon nga bedrock nga tukoran sa tulay, pagpabarge sa aggregates gikan sa Leyte, pagpasugod na usab og bansay sa mga local workers, problema sa pagpanguha sa supply ug sa daut nga panahon, segun pa sa DPWH. 

Usa ka nilumpong nga proyekto nga gipundohan sa huwam gikan sa gawas, ang mga tulay nga gipatuman sa contractor, gisupervise usab sa DPWH Unified Project Management Office (UPMO), segun pa ni DPWH District 1 Engr. Francis Antonio L. Flores.

Iya usab nga gipasabut nga kay may foreign funding, ang mga tulay isupervise lamang sa DPWH Central Office UPMO.

Kay 73% sa kinatibuk-ang pundo gikan sa nasud nga Hapon, matud sa japanese consultant nga si Engr Masatoshi Kawahara nga ang ilang design alang sa mga tulay, gihimo subay sa batakan nga makalahutay sa mas kusog pa nga linug.

Mas lig-on, mas lamakahutay ug mas kasaligan ang desinyo nga makatagbaw gayud, pasalig sa Hapon.  

Kahinumduman nga ang mga nahishutang tulay, apektado sa linug og sa mga aftershocks niadtong 2013, butang nga buot nang mapug-ngan pa sa pagkadaut.

Tungod niini, pasabut ni Engr Kawahara, ang ilang desinyo nakinahanglan og mga kongkreto nga pilote tungod kay sa kahabogon sa tulay ug sa kabug-at niini, ang "base" niini nga inay bedrock, humok og dali ra ang liquefaction.

Inay wooden piles ang ibagdok aron ikapalig-on sa mga approaches, concrete piles na ug ang mga materyales nga gigamit, ikarga pa sa barge gikan sa Leyte, ug mag-agad usab ang byahe sa maayong tempo, segun pa usab sa DPWH.

Giangkon hinuon sa Hapon nga consultant nga dili man nila mahuman sa Hunyo ning tuiga, segurado sila nga sa Agosto pohon, hipno na ang tanan.  

Ang mga nahisgutang mga tulay, gawas pa sa mga karsadang gipangbakbak apan wala pa trabaho-a, nahimong maoy tinubdan sa kalagot sa mga Bol-anong sumasakay ug mga motorista, ug gituohang may milagrong nanghitabo niini. (rahc/PIA-7/Bohol)

Gipasabut ni DPWD DE Engr Francis Antonio Flores ug Engr Masatoshi Kawahara  nga nakabagat og mga suliran ang pagpahuman sa mga tulay sa Bohol nga gipatulod human maapektohi sa linug naidtong 2013. Hinuon, ilang gipasalig nga humanon kini sa Agosto ning tuiga. (rahc/PIA-7/Bohol)