OPA, subling mi-awhag sa MAOs/MAs sa pagsumiter 

sa ilang nominasyon alang sa SUHID 2018 

TAGBILARAN CITY, Mayo 28 (PIA)--Subling gi-awhag sa kagamhanang probinsiyal sa Bohol pinaagi sa Office of the Provincial Agriculturist (OPA) ang mga Municipal Agricultural Officers/Municipal Agriculturists (MAOs/MAs) sa pagsumiter sa ilang nominasyon alang sa nagkalain-laing kategorya alang ning tuig nga SUHID sa Malampusong Mag-uumang Bol-anon. 

Si SUHID focal person Eleno Evangelista mibutyag nga gawas sa mga suwat nga ilang gipadala niadtong ikatulong semana sa buwan sa Marso ning tuig ngadto sa mga MAOs/MAs, nagpadala usab sila og mensahe pinaagi sa Bohol Law Enforcement Communication System (BLECS) aron sa pag-awhag kanila sa pagduso sa ilang nominasyon. 

Gitakda karong Mayo 30 ang katapusang adlaw sa pagduso sa mga nominasyon apan sa pagkakaron, upat pa lamang ka nominasyon ang nadawat sa OPA. 

Ang maong mga nominasyon naggikan sa mga lungsod sa Antequera ug Pilar alang sa Rice Farmer (Adopting Integrated Farming), Corn Farmer (Adopting Integrated Farming), Rural Improvement Club (RIC) ug Large Animal Raiser nga mga kategorya. 

Ang nagkalain-laing kategorya sa SUHID ug ang mga premyong madawat mao ang mosunod: Outstanding Young Farmer – P5,000; Outstanding Young Fisherfolk – P5,000; Outstanding Young Farmer Association – P15,000; Rice Farmer (Adopting Integrated Farming) – P10,000; Corn Farmer (Adopting Integrated Farming) – P10,000; Organic Agriculture Practitioner Farmer – P10,000; Fisherfolk (Freshwater Fishponds) – P10,000. 

Fisherfolk Association – P15,000; Farm Family – P10,000; Municipal Agriculture and Fishery Council (MAFC) – P15,000; Farmer’s Association – P15,000; Rural Improvement Club (RIC) – P15,000; Most Outstanding Rice-Duck Farmer – P10,000; Municipal Agriculturist/Agricultural Officer – P5,000; Rice Technician – P5,000; Corn Technician – P5,000; HVCDP Technician – P5,000; High Value Commercial Crop Farmer (Fruit) – P10,000; Fishery Technician – P5,000; High Value Commercial Crop Farmer (Vegetable) – P10,000. 

Most Outstanding Japonica Rice Farmer – P10,000; Outstanding Hybrid Rice Farmer – P10,000; Outstanding Organic Agriculture Farmers Group – P15,000; Outstanding Fisherman Fish Capture – P5,000; Outstanding Cassava Farmer – P5,000; Outstanding Banana Farmer – P5,000; Outstanding Agri-enterprise for Fishery – P15,000; Outstanding Ka-ABAG – P5,000; ug Outstanding Agri-enterprise for Crops – P15,000. 

Ang SUHID sa Malampusong Mag-uumang Bol-anon tinuig nga kalihokan sa lalawigan nga nagtinguha sa pag-ila sa mga bantogang mag-uuma, mangingisda, agri-enterprise, livestock raisers, agri-based organizations ug farmers cooperatives sa Bohol. (ecb/PIA7-Bohol).