Retooling course alang sa Bohol 4-H club/ 

Youth coordinators, gipahigayon sa ATI-7 

TAGBILARAN CITY, Mayo 8 (PIA)--Tulo ka adlaw nga retooling course alang sa Bohol 4-H club/Youth coordinators ang gipahigayon niadtong Mayo 2-4, 2018 sa Agricultural Training Institute (ATI) Regional Training Center didto sa barangay Cabawan, ning syudad. 

Ang 4-H Club usa ka kapunongan sa mga kabataan (in ug out of school) nga may edad gikan 10 anyos taman 30 anyos nga nalambigit sa programang pang-agrikultura ug proyektong panginabuhian. 

Tinguha niining madasig ang sektor sa kabataan nga makabig sa agrikultura ug pangisda ug mapalambo ang ilang kapabilidad isip potensyal nga mga lideres sa pagsulong sa pagpatubo ug kaugmaran sa agrikultura. 

Sa lalawigan sa Bohol, may mga bag-ong batan-ong entrante sa mga buhatan sa Municipal Agriculture nga gi-designar isip 4-H o Rural based organization (RBO) coordinators, samtang ang uban kinahanglang ipa-usbaw ug bag-ohon ang ilang kahibalo ug kahanas sa pagkupot nila sa importanteng papel sa organisasyon, pag-mintinar ug sustener sa 4-H clubs. 

Mga 24 ka coordinators gikan sa lalawigan sa Bohol ang naka-kumpleto sa pagbansay nga gidumala sa mga facilitators ug resource speakers sama nila Angeline Bondad-Chief of the Rural Institutional Development Division sa Provincial Agriculture Office – Negros Oriental ug Dr. Gracia Arado-Training Center Superintendent I sa ATI-7. 

Ang mga inputs sa 4-H naglakip sa community organizing, extension, leadership ug management skills ang gipa-ambit atol sa maong kurso diin may experiential sharing, games, group dynamics, ug workshops usab isip schemes. 

Si ATI-7 Center Director Dr. Carolyn May Daquio sa iyang mensahe mihisgot unsaon sa 4-H nga makatabang sa pagkab-ot sa tulo (3) A’s sa Food Security nga mao ang Affordability, Accessibility ug Availability. (ecb/PIA7-Bohol/ATI-7). 

Ang mga partisipante sa retooling course kauban ni ATI-7 Training Team nga gipangunahan ni Dr. Gracia Arado (hulagway sa ATI-7)