Bag-ong delivery van alang sa mga nagbuhi

og native chicken sa Bohol, gitugyan sa DA

TAGBILARAN CITY, Bohol, September 27 (PIA)--Gitugyan sa Department of Agriculture-Central Visayas (DA7) pinaagi sa Agribusiness and Marketing Assistance Division (AMAD), ang usa ka unit nga delivery van ngadto sa Bohol Native Chicken Growers Association (BoNaCGA) nga gipahigayon sa Egay's Farm sa lungsod sa Dauis ning bag-o lang.

Ang delivery van, nga nagkantidad og P1,145,000.00 gipundohan ubos sa Enhanced KADIWA ni Ani at Kita Financial Grant Assistance Program sa DA.

Ang Officer-in-Charge-Regional Executive Director sa DA7 nga si Joel Elumba ug AMAD Chief Petronila Corpuz, uban ni Bohol Gob. Erico Aristotle Aumentado, nitunol sa yawe ngadto kang Marilou Escalona, ​​​​presidente sa BoNaCGA.

Kining programa nihaom sa mandato ni Presidente Ferdinand R. Marcos sa pag-maximize sa lokal nga produksyon sa pagkaon.

Si Gob. Aumentado nipasalig sa mga miyembro sa BoNaCGA nga kaalayon ang kagamhanang probinsyal sa Bohol sa ilang paglambo, kauban ang Office of the Provincial Agriculturist (OPA).

Mipadayag sa iyang pahalipay si Aumentado ug nanghinaot nga ampingan sa mga miyembro sa BoNaCGA ang bag-ong delivery van alang sa ilang asosasyon.

Gitumbok sa gobernador nga sa pag-abante sa lalawigan, hingosgan ang sektor sa agrikultura. (ecb/PIA7-Bohol)

Gipangunahan nila AMAD Chief Petronila Corpuz ug DA7 Officer-in-Charge-Regional Executive Director Joel Elumba uban ni Bohol Gob. Erico Aristotle Aumentado ang pagtunol sa yawe sa delivery van ngadto kang Marilou Escalona, ​​​​presidente sa BoNaCGA. (DA-7/PIA7-Bohol)