Bag-ong fare matrix mahimo nang

kuhaon sa mga PUV operators – LTFRB

TAGBILARAN CITY, Bohol, September 26 (PIA)--Gipahibalo sa Land Transportation Franchising and Regulatory Board (LTFRB) niadtong Huwebes, Setyembre 22 nga mahimo nang mag-request ang mga public utility vehicle operators og updated fare matrix isip pagpangandam sa nagsingabot nga pagsaka sa plitehan.

Sa usa ka Facebook post, gipahayag sa LTFRB nga kinahanglang ipaskil ang fare matrix sulod sa sakyanan isip parte sa ilang fare increase order.

Alang sa mga operator nga mokuha og fare matrix, kinahanglang magdala og pinakabag-ong OR/CR sa sakyanan gikan sa Land Transportation Office, franchise verification, kopya sa provisional authority o certificate of public convenience ug office receipt of payment.

Gipahibalo usab sa LTFRB nga bukas ang ilang buhatan aron modawat og mga request sa Fare Matrix/Guide gikan Lunes hangtod Sabado.

Matud pa nga mahimong modiretso ang PUV operators sa window 13 o 14 alang sa payment assessment, magbayad sa cashier ug modiretso sa window 12 aron magpasa og documentary requirements.

Gipahibalo usab sa buhatan nga may 2 ka adlaw nga paaboton usa madawat o makuha ang fare matrix.

Kahinumdoman nga sugod Oktubre 3 adunay pagsaka sa plitehan sa mga pampublikong sakyanan.

Nagpahinumdom ang LTFRB nga bawal pang magsaka og singil sa plitehan hangtod dili pa moabot ang takdang adlaw nga gigahin nila alang niini. (ecb/PIA7-Bohol)

Mahimo nang mag-request ang mga Public Utility Vehicle (PUV) operator og bag-ong Fare Matrix/Guide human sa pagpatuman sa LTFRB og fare increase sa mga pampublikong sakyanan nga epektibo na sa ika-3 sa Oktubre 2022. (LTFRB/PIA7-Bohol)