Bohol Dist II himoo’ng hub

Sa Industrial development

SAN VICENTE Dagohoy, Bohol, Sept 27 (PIA)—Itaud sa liog sa Segundo Distrito ang yugo sa pag-ugmad sa mga industriya, kini maoy gibutyag ni Gob Erico Aristotle Aumentado sa usa ka presscon dinhi, kap-os sa paniudto.

Ang Unang Distrito sa Bohol halos nahilambigit na sa tourism development, samtang ang ika tulong distrito sa Bohol,maoy gisaligan sa pagpanguma.

Kini usab samtang gipalabtik sa gobernador nga dili mahimo nga magparehas ang laraw sa pag-ugmad sa tulo ka distrito sa Bohol.

Ang pagka-duol sa Segundo Distrito sa Sugbo, haum ang industrial development sa distrito, diin mahimong kini makapatrabaho sa mga nagsugwak nga mga trabahante nga padayon pang nanikaysikay og kapanarbaho-an.

Kini usab samtang gipahinumdom sa gobernador nga kasagarang dagkong kompanya sa gahum dagitab, didto gyud magtutok sa ilang tukoran sa Ubay.

Maayo didto kay duol sa Imelda Sub Station, ug ang mga kompanya, sayun rang mopasulod sa ilang local nga makuha nga koryente aron ikatabang usab og apud-apod sa grid.

Ang dagkong kompanya usab sa gahum dagitab, maoy kasegurohan ngadto sa mga mamumuhunan sa kasaligan ug abunda nga supply as koryente nga mopaandar sa mga pabrika ug planta.

Mahimong hugaw ang trabaho sa mga industriya apan mas nindot kini og suhol kon itandi sa ubang trabaho nga anaa sa opisina apan dyutay rag sweldo.

Hinuon, gipadayag usab sa gobernador nga iyang paningkamotan nga makasulod usab ang ubang kompanya nga nagpakayab sa limpyo nga enerhiya, ngadto sa uban nga distrito, aron makab-ot na sa Bohol ang matuod nga resilience sa gahum dagitab.

Si Aumentado personal nga ming-adto sa paglusad sa solar power project sa Dagohoy, samtang iyang gidason nga kinahanglan nga ipakatag ang pag-ugmad sa gahum dagitab sa tibuok lalawigan, aron may mas kasaligan nga tinubdan ug mahimong dili na mag lukop ang maapektohan kon dunay madaut. (RAHC/PIA-7/Bohol)

WALAY KOMPETISYON. Industrial Development, matud pa ni Gob Aris Aumentado alang sa ika duhang distrito sa Bohol. Kinahanglan nga magkalainlain ang sakyanan sa pag-ugmad, aron mas makalahutay kinivkon may usa ka plano sa pag-ugmad ang dili mogaya, pasabut ni Gob Aumentado. (PIAbohol/Photo ni Ric Obedencio)