Mga walay trabaho, wala makatiwas

Sa kolehiyo nanalaw sa ika-2 tupokan

TAGBILARAN CITY, Bohol, Sept 15 (PIA) –Segun sa usa ka online survey nga gipadagan sa Department of Health (DOH) niadtong Mayo 12-19 ug giapilan sa mga hamtong na nga Pinoy, kasagaran na wala na makatiwas sa pagpabakuna, kadtong mga wala’y trabaho ug wala makatiwas sa kolehiyo.

Ang kasayuran nga napalutaw sa survey nagbutyag usab nga sa primary series sa mga bakuna (o kadtong una nga mga tusokan sa bakuna), mas ubos ang kadaghanon sa mipatupok sa ikaduhang tupokan sa priority group A3 o may comorbidity, mga kalalakin-an, ilabi na niadtong medyo batabata pa, taga Visayas ug Mindanao, ug kadtong ang kita sa panginabuhi-an ubos pa sa kasagarang kitaon matag adlaw.

Nakita-an usab nga ang kasagaran nga nanalaw sa ikaduhang tupokan, tungod kay nahadlok sa side effects.

Segun sa survey, sa 86 ka mga tawo nga wala motiwas sa ikaduhang tupokan, 60 kanila o 70% ang nalisang sa side effects nga kasagaran makit-an sa hilanat ug ubo.

Sa 86 usa nga wala motiwas og pabakuna, 26 niini o 30% kanila, mipalubad sa ilang kahadlok tungod kay nagtuo sila nga walay motabang kanila kon ugaling mag-side effects na sila kon mabakunahan.

Kawhaan usa sa 86 ka tawo nga wala na magpatupok sa ikaduhang tupokan, wala motuo nga ang bakuna, magtabang kanila nga mapanalipdan sa grabe nga atake sa COVID 19 ug sa kamatayon nga dala niini.

Hinuon, matud ni Dr Van Phillip Baton, tigpamaba sa DOH -7 ug kinsa taga Bohol, sa 86 nga wala na motiwas pag patupok sa ika duhang tupokan, 32 kanila ang nakadawat og suporta dihang migawas ang saide effect sa unang tupokan.

Kini karon ang magpatin-aw nga aduna gyud diay suporta alang sa mga magside effect, saysay ni Dr. Baton.

Sa 86 ka mga natupokan sa unang tupok apan wala na magpa-usab pa, 31 kanila ang walay nasinati nga side effects, o kon aduna may, wala ray delikado gawas sa pagpamanhud sa dapit nga gitupokan.

Katloan usab sa mga nabakunahan sa unang tupokan, misalig nga ang bakuna, magpanalipod gayud kanila batok sa grabe nga atake sa COVID ug maglikay kanila sa tataw nga kamatayon kon matakdan. (rahc/PIA_7/Bohol)

KAKUWANG SA PAGPASABUT. Gipakita ni Dr Baton ang survey nga nagpakita nga kasagarang nanalaw sa ika duha nga tupokan, kuwang lang gayud sa pagpasabut sa epekto sa baluna, sa side effects ug sa pag-atiman niini, ug sa kapasidad sa bakuna nga magpanalipod sa nabakunahan sa mas grabe ug makamatay nga atake sa COVID. (rahc/PIA_7/Bohol)