Rice allowance sa mga trabahante sa

gobyerno, planong ihatag ni PBBM

TAGBILARAN CITY, Bohol, September 15 (PIA)--Plano ni Presidente Ferdinand “Bongbong” Marcos Jr. nga manghatag og rice allowance sa mga trabahante sa gobyerno tungod na usab kini sa panginahanglan sa pagpagaan sa ilang inadlaw-adlaw nga galastuhan taliwala sa pagsaka sa presyo sa mga nag-unang panaliton ug serbisyo.

Matud pa sa Pangulo nga ang paghatag og rice allowances parte sa istratehiya sa gobyerno aron mare-organisa ang tibuok value chain system sa produksyon sa agrikultura.

“I’m going to initiate, at least for the government workers, the rice allowance. Part of the sweldo, ang pagbayad is in rice para nakakatiyak tayo, every family will have rice,” matud pa ni Marcos sa pakighinabi ni TV host-actress Toni Gonzaga sa ALLTV Channel niadtong Martes, Setyembre 13.

Si Marcos, kinsa mao usab ang nangulo sa Department of Agriculture (DA), niingon nga ang mga bugas nga ipang-apod-apod paliton sa gobyerno tungod kay mas barato kini kaysa gibaligya sa presyo sa merkado.

Matud niya nga kini nga inisyatiba makabenepisyo usab sa mga prodyuser sa bugas tungod sa gipaabot nga pagsaka sa panginahanglan sa bugas.

Gidugang pa sa Pangulo nga kinahanglang usbon sa gobyerno kun giunsa ang pagpuyo sa mga kabus sa lebel sa subsistence o ang kondisyon nga adunay igo lang nga pagkaon o salapi aron mabuhi.

“It should not be at a subsistence level, they should not be spending 60, 70, 80 percent of their income on food. That’s far, far too much (Dili kini kinahanglan nga subsistence level, kinahanglan dili sila mogasto og 60, 70, 80 porsyento sa ilang kita alang sa pagkaon. Kana layo, sobra ra kayo),” matud pa sa Pangulo. (ecb/PIA7-Bohol)

Sa iyang pakighinabi sa host nga si Toni Gonzaga niadtong Martes, Setyembre 13, 2022, si Presidente Ferdinand “Bongbong” R. Marcos Jr. miingon nga nagplano siya nga mag-institutionalize og rice allowance alang sa mga trabahante sa gobyerno aron matabangan sila sa inadlaw-adlaw nga galastuhan taliwala sa pagsaka sa presyo sa mga nag-unang palaliton ug serbisyo. (OP/PIA)