Schedule sa pagduso og COC

sa Barangay ug SK, gibalhin

TAGBILARAN CITY, Bohol, September 23 (PIA)--Gibalhin sa Commission on Elections (Comelec) ang pagduso sa Certificates of Candidacy (COC) alang sa Barangay ug Sangguniang Kabataan Elections (BSKE) sa katapusang bahin sa Oktubre gikan sa orihinal nga schedule nga gitakda sa unang semana sa buwan.

Sa usa ka gibag-ong kalendaryo sa mga aktibidad alang sa mga nahisgotang botohan nga gipagawas niadtong Huwebes, Setyembre 22, gi-aprobahan sa poll body ang bag-ong schedule sa pagduso og COC gikan Oktubre 6 hangtod 13 ngadto na sa Oktubre 22 hangtod 29.

Ang mga kandidato mahimong moduso sa ilang COC sa Office of the Election Officer (OEO) sa ilang lungsod o munisipalidad.

Ang petsa sa panahon sa pagduso og COC nakalatid sa Section 7 sa Republic Act (RA) 6679 kalabot sa Section 29 sa RA 6646.

Apil na usab ang panahon sa eleksyon nga pagsugod sa gun ban gibalhin gikan Oktubre 6 hangtod Disyembre 12 ngadto na sa Nobyembre 6 hangtod Disyembre 20, 2022.

Samtang gipabilin ang panahon sa kampanya gikan Nobyembre 25 hangtod sa Disyembre 3.

Ang oras sa pagbotar sa adlaw sa eleksyon magsugod sa alas-7 sa buntag ug mahuman sa alas-3 sa hapon.

Ang katapusang adlaw alang sa pagduso og Statement of Contribution and Expenditures (SOCE) sa mga kandidato gitakda sa Enero 4, 2023. (ecb/PIA7-Bohol)

Ang gibag-o nga kalendaryo sa mga kalihokan alang sa Disyembre 5, 2022 Barangay ug SK Elections. (Comelec/PIA7-Bohol)