‘SSS on Wheels’ momaneho aron

mapaduol sa SSS ang atua sa layo

TAGBILARAN CITY, Bohol, Sept 19 (PIA) –Bisan pa kon gibuksan na sa Social Security System (SSS) ang ilang online facility alang sa ilang mas sayon nga pagtanyag sa serbisyo ug mas sayon pagduol niini, sa dili madugay, magpahiluna na usab ang ahensya og SSS Service on Wheels.

Matud ni SSS Vice President for the Visayas, Atty Alberto Montalbo, ang Service on Wheels magpaduol sa SSS ngadto sa mga layo nga komunidad nga walay duol nga field offices.

Segun sa labing bag-o nga taho, 40 ka mga sakyanan ang una nga gipalit sa SSS aron maoy magamit niining serbisyo, segun sa taho ni SSS Presidente Michael Regino, dili pa dugay.

Ang sakyanan nga alang sa programa, may kaugalingon nanga kara nga mga pasilidad ug online connection para sa mas dali nga pagproseso sa mga transaksyones, ilabi na kay mobalhin na ang SSS ngadto na sa digital transactions sa dili madugay.

Dinhi sa Bohol, samtang may mga kalungsuran na nga may nakapahimutang nga SSS service desks nga regular nga anhaon sa taga SSS, daghan pa gihapon ang lugar nga gikinahanglang masulod sa SSS aron mas mapamaayo ang ilang serbisyo.

Ug dungan niini, ang onsite services unya sa kagamhahan ilabi na kadtong may kalambigitan sa SSS ilabi na sa pagpasayon sa serbisyo ug pagtubag sa mga pangutana kabahin sa serbisyo sa ahensya, mas dali ug mas sayun na, dugang padayag ni Engr. Alieta Basubas, ang hepe sa SSS Bohol, didto sa us aka pagpakighinabi.

Pinaagi usab niining serbisyo, milaum ang SSS nga mas makatabang sila sa kadaghanan ilabi na niining nagpadayon nga hulga sa COVID kay makuhaan na ang permi gyud maghuot ang mga kliyente nga giserbisyohan sa ilang mga field offices.

Sa Service on Wheels, lakip na unya sa serbisyo maoa ng pagdawat sa mga transactions sama sa pagpahiluna sa online registration, pagduso sa salary loan application, pagpasa sa mga aplikasyon sa claims sama sa sickness, maternity, disability, retirement, death ug funeral.

Mahimo usab nila ang pagpadali sa requests alang sa pag-usab ug pag-update sa data sa SSS registrations sama sa pag-usab sa apilhido sa mga babayeng membro nga naminyo, o sayop nga entries. (RAHC/PIA-7/Bohol)

MANEHO SA SSS. Aron mapaduol ang serbisyo sa mga layo nga komunidad, manehoon sa SSS ang ilang Service on Wheels didto aron dalhon ang serbisyo ngadto sa tugkaran sa mga wala pa maserbisyohi sa ahensya, niini, makalingkawas na ang kadaghanan sa way pagkahubas nga pinilahay sa mga klieyente sa mga opisina sa SSS, matud ni Atty Alberto Montalbo, SSS vice president sa Visayas.