Namuhig baboy mikunhod,
Presyo sa karne, mingsaka

TAGBILARAN CITY, Bohol, April 19, (PIA) – Adunay namatikdang pagkunhod sa prouksyon sa baboy sa Bohol sa katapusang tulo ka tuig, ug mahimong tungod sa padayon nga hulga sa African Swine Fever (ASF), mala na magpahinayak ang mga kasagarang mamuhiay og baboy nga anaa lamang sa ilang mga kusinahan.

Kini maoy napalutaw nga kasayuran sa gipaambit nga datus ni Dr. Stella Marie Lapiz, didto sa labing bag-o nga tigum sa Association of United Development Information Officers (AUDIO) nga gidumala sa Philippine Information Agency, didto sa Capitol Sangguniang Panlalawigan Session hall sa miaging semana.

Sa Unang Distrito pananglitan, sa tuig 2020, mikabat sa 86,686 ka baboy ang gibuhi, unya mikunhod kini sa 66,808 sa 2021 ug mas mi-ubos pa sa 2022 diha nga namatikdan nga 65,304 na lang nag baboy nga gibuhi sa distrito.

Sa ikaduhang Distrito, sa 2020, natala ang 57,015 ka baboy nga gibuhi, ug sa 2021, mingsaka kini ngadto sa 58,961. Apan sa 2022, mingtibugsok kini sa 40,411.

Sa Ikatulo nga Distrito, gikan sa 65,599 ang gibuhi sa 2020, ming-ubos kini ngadto sa 58,057 sa 2021 ug mipadayon pa sa pag-us-os sa 2022 ngadto sa 38,195.

Gawas sa kahingawa nga basin og ma-impas ang puhunan tungod sa dili pa maseguro nga pagkuyanap sa makamatay nga sakit sa baboy, naapektohan usab niini ang presyo sa komersyal nga pagkaon sa baboy.

Dala sa kahadlok nga makasulod sa Bohol ang sakit sa baboy, nagpagawas ang mga tinugyanan dinhi nga pugngan una ang pagpasulod sa mga buhi nga baboy, karne, o giluto nga karne sa baboy nga gikan o milabay sa mga lugar nga namatikdan na nga giatake sa ASF.

Gawas sa mga karne, gidid-an usab ang pagpasulod sa mga pagkaon sa baboy nga gikan sa mga dapit nga naigo na sa ASF, hinungdan nga nagnihit ang mapalit nga lawog.

Sa pagnihit, mimahal na ang presyo sa lawog, ug daghan na nga nangundang.

Apan matud ni Dr. Lapiz ngadto sa mga information officers, sa nagkadyutay nga karne nga maihaw tungod sa pagpangundang sa uban sa pagpamuhig baboy, namatikdan na usab nga mi-maayo ang presyo sa karne nga gikan sa mga binuhing baboy sa mga Bol-anon.

Gikan sa Oktubre 2022 nga tag P305 pa ang lumo, P345 ang tiyan ug P280 ang hamon, mingsaka na og P10.00 o tag P315 na ang lumo, P355 ang tiyan ug 300 na ang hamon niadtong Marso 2023 sulod sa mga malls.

Niini, matud sa mga beterinaryo, kini na ang maayong higayon nga mamuhi og baboy, seguradohon lamang ang bio-security niini aron dili matakdan sa sakit, kay maayo na ang presyo sa merkado. (PIA-7/Bohol)

SEGURADOHA LANG ANG BIOSECURITY SA BABOYAN. Nanawagan si Dr Stella Marie Lapiz sa mga nagpabiling namuhig baboy nga limpyohan permi ang tangkal ug dili pasudlan ni bisan kinsa ang baboyan aron menosan ang higayon nga makasulod ang sakit nga gikan sa gawas. (PIABohol)