Bigiw, sentro sa exhibit

Sa NM sa Boholano life

TAGBILARAN CITY, Bohol, May 31, (PIA) –Sakayan nga bugsayan nga amakan na ang gisumpay sa kasko, nakakita ka na ba niini?

Ang bigiw, sakayang bugsayan nga katigan nga may kasko nga gikulit nga troso, dili na kasagaran makit-an sa Bohol apan anaa karon naka-exhibit sa National Museum Bohol, possible nga ang nag-inusarang bigiw amakan nga masakyan pa, nga nia dinhi sa Bohol karon.

Ang bigiw, apil sa mga karaang butang nga maoy magsibing bintana sa mga bag-ong tubo ug sa mga katawhan aron ilang malantaw ang pamaagi sa kinabuhi sa mga Bol-anon kaniadto.

Maoy sentro nga pasundayag nga halad sa National Museum (NM) Philippines pinaagi sa NM Bohol alang sa adlaw sa mga mangingisda, Mayo 31, ang bigiw u gang sugilanan sa mga Bol-anon nga natuhog sa gatusan ka mnga katuigan, gisaysay pinaagi sa mga karaang butang nga nakuykuyan, naugkat ug napahibalik nga kinaiya ug gamit, matud ni NM Deputy Director for Museums, Jorell Legaspi, atul sa pagbukas sa exhibits.

Gibuksan nga nalakip sa mga karaang butang gikan sa mga bato nga gamit sa mga sa naha-unang Bol-anon, ngadto sa mga karaang gamit nga ginama sa clay nga gibanabana nga diha na sa wala pa moabut ang mga Kastila, ang uso kanhi nga lungon nga kinulit sa tibuok troso aron sudlan sa mga nahipos nga bukog sa mga kabanay nga namatay, kini nga mga gamit nakubkob, napunitan ug nakaykay sa mga archaeologists ug anthropologists didto sa Anda Peninsula, kasubangang bahin sa Bohol.

Anaa usab didto ang panghagban o gamit sa paghabol, gamit sa panguma ug panagat nga maoy nahaunang gikabuhian sa mga katiguwangan, nagsaysay sa kakugi, kamamugnaon ug sa kahalangdon sa karaang kinaiya nga maoy naghulma sa mga Bol-anon karon, dugnag ni Atty Cecilia Tirol, Director sa NM Visayas Museums. .

Gawas sa bigiw nga may hagip-ot nga kasko nga gisumpayan og sinibit nga amakan, alang sa mas gaan, mas tulin ug mas dali iulin nga bugsayan, makit-an usab didto sa bag-ong permanente nga gallery sa mga karaang gamit sa panagat, pagg-uma, pananggot, paghabol ug ang gikahinaman nga asin tibuok nga halos mawala na unta sa Bohol.

Kini nga mga exhibit, bukas alang sa tanan, ug sugod ugma sa alas 9:00 nagdto sa alas 5:00 Martes ngadto sa Domingo. (PIA-7/Bohol)

BIGIW AMAKAN. Human sa tulo na ka dekada nga wala nany nanghimo og bigiw, gibalik ni Alejandro Jubac ang nawala na nga katakus sa paghimog sakayan nga amakan, nga karon makit-an sa Bohol Museum. Kauban ni Alejandro Andot Hubac ang iyang asawa nga si Nemesia, sa pagbukas sa exhibit sa Paglawig. (PIAbohol)

NABANHAW NGA BIGIW. Kon naa pa may nahibilin nga bigiw karon, segurado nga gabuk ug dili na masakyan, sahi sa makit-an sa National Museum Bohol karon nga bigiw nga tgituyoan gayud og himo aron ipabalik ang talagsaon nga sakayang bugsayang katigan. (PIAbohol)